馬主論戰

魑魅魍魉

任達華：夢幻組合橫掃

　　今日告東尼只係派五駒上陣，但我依然睇好佢有馬贏，先推介尾場「夢幻組合」，上場跑1200米沙田銀瓶，對住「點心」、「金德寶」同「同一世界」等惡馬都跑第四，今次落番嚟二班跑真係着數到暈，初跑谷草可望憑級數橫掃對手。

　　另外鍾意第三場「幸運王子」，季初響田草1200米與「金碧亮馬」、「好友福」同「桃李滿門」跑近，擺明係質高貨色，近期健康已經正常番，只要交出應有水準，隨時可以贏馬開齋。

張敬山：電訊高星再搏

　　我哋隻「電訊高星」上周三跑田草2000米，早段留得太後，結果追唔切。今次匆匆再出改跑谷草1800米，搵番柏寶操刀，應該會有唔同發揮，希望呢隻馬體力頂得住，響煞料前可以順利贏番一場。

　　另一匹心水馬係第三場「威海歡騰」，早排試過兩度響沙田跑近「盈彩繽紛」上名，賽績夠晒硬淨，上場亦響谷草1200米同「包裝猛將」串Q，依家個分有一定着數，今次再跑同程換馬偉昌操刀，排五檔起步唔曳，話唔定可以重開勝門。

梁廷鏘：頭盤轉場起筷

　　大摩剛啱又憑「步步穩」捧走精英盃，近期搏殺手風確係順，今次繼續吼實佢手馬，應該冇錯。最啱心水係第七場「頭盤」（圖），前仗響谷草2200 米開齋，擺明窄場威力強，上場轉跑沙田放得急亦輸唔遠，今次跑番谷草有權施回馬槍。

　　另一匹要留意嘅摩廐馬係第八場「活力至寶」，近兩仗跑谷草1200米獲冠亞各一，證明路有專長，三歲馬評分仲有大量上升空間，今次大摩吼準港交所盃至幫呢匹馬報名，擺明有心攞威，一於吼實佢。