馮諾嘉手記：祥勝愛駒檔靚連捷

魑魅魍魉

　　沙田賽事蔡約翰可以話係霸氣十足，上周三沙田日賽蔡廐又贏四場，但嚟到谷草賽事，當然要捧方嘉柏場，佢今季已有成31場頭馬嚟自谷草，上名率超過四成，今日當然要吼實。

高飛飛有進步

　　精選場次方面，第二場四班1000米，「高飛飛」上場終於喺田草1000米直路賽跑第二，只係輸「精靈勇駿」一個馬位，走勢進步，今場乘勇再戰，未贏馬交代實好鬥志，做膽。配腳方面，「帶利財子」季內贏過兩次谷草1200米，今場則跑1000米，落四班對手較弱外，難得抽到黃金一檔，拖腳首選。葉楚航講明今季飛起柏寶，相信同「千兩寶寶」有啲關係，上場強配柏寶，熱到得2.4倍，可惜只能跑第二，今場畀咗柏寶嘅死對頭韋達跑，可惜排大外檔，惟有作配。「領航動力」九歲老馬，最近仲連番入位，雖然久未贏馬，但同程演出實在準繩，要兼顧。

　　第三場三班1200米，馬膽「祥勝愛駒」，喺香港兩W都係跑同程，上場末段更造出快時間贏馬，姿態好輕鬆，趁弗再出，排二檔可以打叠贏。配腳先揀「威海歡騰」，最近連場上名，上仗跑同程只係以四分三馬位輸畀「包裝猛將」屈居第二，相信今次仍然係前列分子。其次係「勁有盈」，谷草1200米係首本路程，上場跑同程連番意外亦得第三，負磅輕當然要拖。最後係「開心動力」，上場喺韋達胯下入到直路全程受阻，未能發揮出應有水準，今場換上柏寶，應該有更好表現！

　　第九場三班1650米，「旺家多寶」上場被捧成大熱，可惜直路內閃，結果贏馬後畀人告甩，貶為第三，今場強配韋達，有三檔之利，有機會一雪前恥，做膽。配腳方面，「海力童」最近兩場都以唔夠一個馬位嘅距離入位，狀態當勇，優先考慮。「銀太陽」之前十三仗都排外檔，上場跑同程檔劣都放入一席第二，只係輸半個馬位，今場終於畀佢抽到黃金一檔，機會難逢，睇吓可唔可以打破悶局，拖腳必揀。「納帕二號」場場都跑近，演出準繩，初跑谷草亦要兼顧。