數據人生：柏寶當旺 先拔頭籌

魑魅魍魉

　　剛戰韋達、柏寶各贏四場鬥得精采，前者強陣下仍被柏寶取得四W，只能繼續於騎師榜落後四場排第二 ﹔若然馬會賽前推出特別彩池或競猜遊戲，估兩人的頭馬比數，相信這個四比四「馬膽」肯定唔易中。

　　連同周日跑馬地十場賽事在內，今季只餘下七個賽日，預計兩人必會施展渾身解數，務求贏得冠軍榮譽，但有一點值得馬迷留意，就是兩人坐騎季內雖已串Q二十一次，但以他們的上陣數次而言，計落並不算多，如剛戰兩人連場大搏殺，結果只憑「川河勁駒」及「蜚聲」構成大熱Q，既然賠率乏味，投注時似乎便不宜浪費注碼，正如今次筆者睇好頭場「當旺」，買連贏時便不宜拖配上韋達的「辣得喜」。

　　第一場五班1200米，上仗「當旺」於普萊西胯下角逐四班谷草1650米，排五檔起步後即順利貼欄領放，但在多駒鬥燒下，最終末段力弱跑第十，雖然只落後頭馬「燈胆寶」兩個多馬位，但賽後仍獲評磅員減一分，這次得以降級作賽，而幕後亦即時易配柏寶上陣，明顯已有出擊意圖。資料顯示，此子今季三度策方廐馬跑谷草B欄1200米賽事，結果錄得冠季各一之佳績，加上「當旺」歷來一戰五班賽即得第三，可見已集齊捧場條件。

歐陽志恆