借題發揮：蔡約翰攞副麻將出嚟搏 一四八場穩袋

魑魅魍魉

　　連同今次賽事在內，馬季尚有8期就結束，騎師之爭好似未有定論，之但係，冠軍練馬師應該冇得爭嘞，蔡神仙帶離9場頭馬，除非有奇迹出現，如果唔係大摩邊有得追，剩係睇呢次阿蔡攞副麻將出嚟（13隻），擺晒強陣，完全冇話有半點鬆懈，已經擺明要同大摩「保持距離」，所以，如果唔係有咩意外，呢日又會係蔡約翰BIG DAY！

　　亨利索過啲料，蔡廐馬都係表面最突出嗰3件最好信心，即係「如願以償」、「川河勁駒」及「威德妙」，而預期入到腳居然仲有一大堆，如「好日子」、「國寶」、「越跑越有」，同埋尾場兩件。寫咗一大堆馬名，並唔係想呃字數，數數吓七八隻都話有餐士，我都唔係幾信，你估馬場真係佢開嘅咩？！不過，想深一層，成副麻將攞得出嚟，又點會搏得嗰三兩隻咁少！

　　「如願以償」、「川河勁駒」及「威德妙」，前兩駒啱啱贏完，上次以咩姿態贏馬，相信大家仍然記得，尤其係「川河勁駒」先至恐怖，晨操咁款贏幾個身位返嚟，加15分真係一啲都唔重手。至於「如願以償」，上場亦拋甩第三名幾遠吓，明顯佢嘅進度在新馬賽超晒。而「威德妙」上場輸埋門一兩步，但事後睇番，連季軍再出亦補中，佢入Q嘅水準點會差，呢次對手唔多，應該可以坐正。　

亨利