馬主論戰

魑魅魍魉

好小子謀交代

　　蔡約翰今日手馬幾惡，我睇好佢有馬贏，最鍾意第六場「好小子」，近兩場都響田草1400米追入第三，證明評分已經開始有着數，五歲馬來港後仲未贏過，相信幕後都心急謀交代，用普萊西唔會熱得太離譜，一於吼實佢。

　　另外推介第七場「高手」，近兩場非冠即亞，四歲馬擺明仲有分響手，由於本身跑法機動，即使排十三檔起步亦影響唔大，前仗先響楊明綸胯下贏過，人馬默契唔使懷疑，如果臨場有分頭就更加值博。

任達華

冷敲希望之星

　　李易達馬房今季炮製過唔少冷W，今日我都睇好一匹李廐冷馬，第九場「希望之星」上次跑田草1200米時都有提供，結果跑第六返嚟，表現其實唔曳。今次增程跑1400米，應該更啱呢匹均速馬發揮，練馬師團體馬一定把握機會盡快交代，有賠率博得過。

　　另外推介第七場「曬冷王」，上場響田草1400米追入季軍，末段走勢絕對唔講得笑，反映三歲自購馬已經完全適應水土，今次增程跑1600米更加啱佢衝，同場對手唔強，係時候贏番場。

張敬山

卡加大師再贏

　　今日有兩場泥地賽事舉行，先講1200米嗰場，焦點一定落響三戰同程全勝嘅「時時攞彩」身上，不過同場隻「卡加大師」（圖）都絕對唔可以睇小。呢隻馬上場縮程跑谷草1200米，全程走二叠望空跑都照贏，完全係實力嘅表現，轉跑泥地未必唔啱，隨時再贏。

　　另外五班泥地1800米嗰場，「飛躍星河」就相當啱心水，前仗終於贏馬開齋，上場跑谷草1800米亦都後追有勢，今次跑番曾上名路程，用埋何澤堯減磅上陣，話唔定重響勝鼓。

梁廷鏘