馬主論戰

魑魅魍魉

財駿福星爆得

　　剛啱姚本輝憑「勝利金剛」、「勁信心」同「松風」中三元，搏殺手風好順，今次繼續吼實佢手馬應該冇錯。最鍾意第五場「財駿福星」，季內唯一頭馬正係響谷草1800米取得，近兩仗跑沙田同泥地賽，敗績唔能夠作準，今次回師贏馬途程，隨時爆得。

　　另一匹要留意嘅姚廐馬係第六場「普梳王」，今季贏馬嗰場，蹄下敗將包括「蓬萊仙子」、「金碧亮馬」、「勁飛馳」同「安御」等惡馬，賽事水準夠晒高，轉跑谷草隨時一網打盡。

任達華

活力至寶再贏

　　今晚谷草賽事響C+3跑道舉行，跑道較為狹窄，應該會對前置馬較為有利，所以我睇好尾場「活力至寶」可以連捷。上次呢隻馬初跑谷草，兼首度響三班作賽，結果仍順利一放到底贏馬，難度其實好高，今次再跑谷草1200米，隨時再放到。

　　另外要留意第四場「大把在手」，前仗跑田草1200米，對住「相見歡」、「友利多」同「傾力之城」等強敵都跑第四，證明質素唔曳，今次轉嚟谷草上陣，對手實力差一截，應該到交代時候。

張敬山

喜在心頭夠準

　　呢輪天氣唔多穩定，令到賽果唔易估計，唯有盡量揀啲演出比較準嘅馬嚟捧場。最啱心水係第四場「喜在心頭」（圖），近三場跑谷草1200米獲冠亞季各一，表現夠晒忠心，七歲馬難得有勇態一定用得就用，再跑同程應該坐位望贏。

　　另一匹要吼實嘅馬係第五場「旺舖福星」，近兩仗分別跑田草1400同1600米，結果全部贏晒，四歲馬踏入戰鬥黃金期，今戰首次渡江上陣，同父馬「世世無敵」贏過谷草，場地性能唔使擔心，三連捷在望。

梁廷鏘