高清睇跑馬：戶外名駒省招牌

魑魅魍魉

　　今季總場次597谷草五班1200米，「甜蜜至上」十檔起步立即縮在後叠，卓利騎兩步跟住「勁多勝」守六、七位，入直路時繼續跟在「勁多勝」之後，加上外側有「秒秒領先」，因此食正「三文治」未能望空，最後可以跑到一席季軍，只因為「勁多勝」衝刺夠勁，「甜蜜至上」跟隨其跑線才得以入位。再三睇直路片段，其實二百五十米處可在「秒秒領先」之外衝刺，一百五十米處亦可入內檔搵空位，直路持續被困騎者有責，今次易配柏寶兼改爭田草1200米，大可收復前失。

　　另於季內總場次438田草三班1400米，「戶外名駒」初出大敗，奇在再戰埋門由九十九倍落至七十一倍開跑，出閘唔快，留守八、九位，轉入直路向外移出，跟住大熱門「歡樂繽紛」，後駒推騎下率先突圍，但內閃跑入內檔，「戶外名駒」因此很快望空，初時杜利萊只係輕打兩鞭，之後更因為內閃只作推騎，但愈衝愈勁，最後一百米與「歡樂繽紛」埋身肉搏，杜利萊見此又打番幾鞭，果然衝刺更勁，爆出大冷W，能夠擊退之後四戰獲兩冠兩亞的「歡樂繽紛」已誇張，就連遠遠落後的季軍「長勝」之後亦贏馬，足見賽事水準高，今賽乃轉姚廐後首仗，跑贏馬路程可省招牌。　

Sam