借題發揮：博韋達反撲 不如信柏寶 輕輕鬆鬆W纜躉

魑魅魍魉

　　韋達停賽期滿復出，正常思維梗係相信佢會急起直追，始終目前與柏寶頭馬差距又拉番開至6W，話多唔多，話少又唔係少噃。不過，亨利覺得佢餓馬已久，一定傾力反撲，雖則係正常而合理的預測，但都要睇客觀因素，得唔得都好視乎啲馬勝任與否。

　　冇錯，今期係谷草A欄賽事，偏差係冇咁大，但韋達好多坐騎排晒出面，排檔最好果匹已經數到6檔「寶樹友盈」，check過對上3期A欄，縱使有幾多外檔馬勝出，如12檔「跑得叻」、「金碧亮馬」，11檔亦有「星光活力」、「太陽昇」、「勝任有餘」、「大將風範」等等，但上述大部分頭馬俱傾向前置跑法，幾大程度係以跑法克服劣檔，可惜韋達今日有一半以上嘅坐騎唔係放頭馬，個心點會唔冷一截。

　　反而阿寶可能真係好旺，呢期好多馬檔位好正，1至5檔佔5駒，服未？！講到果手馬就更比韋達好得多（唔怪得騎師王隔晚開飛賠率，1個唔夠兩個開，1個有接近8倍），望落佢嘅坐騎如文廐4駒已經誇啦啦，幾乎全部有近績撐腰，隔夜亦全線有飛，睇落對晒辦。當然，威哥果匹「輕輕鬆鬆」，更加係纜躉之一，隻馬今場用番外地戴開而贏過嘅眼罩，仲贏埋個大閘show畀大家睇，咁明刀明槍，點會信唔過！　

亨利