洪禮賢講馬：較量轉程啱時機

魑魅魍魉

　　較量轉程啱時機柏寶昨晚騎師王好熱吓，捧到唔夠兩個開，係咪意味着今期會大開殺戒，其實真係兩睇，事關呢期好多騎練嘅馬都似好非好，熱門陷阱唔少，當然包括阿寶嘅坐騎。反而幾位小將唔少邊線馬，如小楊已是其中一員。

重心場次

第6場  第四班（60-40分）1600米

　　較量上場跟好位返嚟但P都冇，的確係失望，但有兩點可開脫敗因，其一，三班壓力可能真係太大，其二，目前性能或已轉。總之，今場降班和加程跑中距離，將會係畀佢最後機會的借口。
   
　　「共同努力」早已盯實，之前亦講過，目前性能以一哩最好，肯集中火力，帶出求勝決心。「越跑越有」近兩仗留得太後，處理上唔啱心意，希望今次縮程及檔好，肯在跑法上做番妥善，隨時變身。
   
　　「名人」兩Ｗ在手，計往績叻過晒呢棚對手。「喜綵」再經過上賽之敗，已要止蝕離場。「福到財星」1800米應是最佳路程，此程恐爆唔起。「標青」上場轉了咇有幫助，好開唔排除喼得到。

第1場 第五班（40-0分）1400米

　　誠信心上場谷草1000米根本唔啱跑，末段依然有兩腳，的確唔容易。重返此程啱數，檔好又可沿途慳位，半冷抵博。「五代同堂」及「覓得寶」，一對主動型馬，跑法上會賺到。
   
　　「特別靚」向來冇穩定性可言，隨時打回原形。「卓越精英」如果唔係隔得耐冇跑，可能搵佢行頭，總認為隻馬有分揸手。「時時有機」唔係排十三檔應該有機會。

第2場  第四班（60-40分）1200米

　　大把在手比較兩役表現，上賽不特止唔慢閘，前中段冇欄蝕住望空，都係去到拉士200米才力弱，真係唔簡單﹔呢次外檔未知可否克服，但對手實力下降，或有優勢。「上海先鋒」初出走勢犀利，手上有一定虛分。
   
　　「來福」唔叻，勝在狀態向來穩定。「長勝」永冇穩健可言，就算落班及有柏寶，充其量拖腳。「飛魚駿王」漸漸跑入狀態，只虞10檔的風險。餘駒幾難揀得上手，勉強可諗埋「勁辣椒」。

第3場  第四班（60-40分）1000米

　　好運精選近3場不斷試緊跑法，試到上賽終於有效果，即刻轉程兼用到最強配搭，有大決心。「清新空氣」和「威威財星」一對馬只得一個難題，就係究竟騎者能否勝任﹖﹗
   
　　「可圈可点」四班有着數，惜近況去唔番盛時，不過明顯比早前冇咁呆，捧場與否不妨睇埋今日行圈水準先決定。「勁高手」來港前已有準備，所以運抵後試兩個閘即刻出得，反映進度嚟得快。「寶再威」陣上氣管經常有血。

第4場  第五班（40-0分）1400米

　　創先機以前行圈急到成身汗，情緒亦波動，但近仗已改善了，令成績喼到唔走樣，趁勢再戰此程，用埋愛將，求勝格。「晨速」上場唔係喺最後100米受阻，有Ｐ唔奇，既然於季尾呈上升勢頭，再追。
   
　　「百威紀錄」剛仗全程「外遊」，敗績不用計，忽然有１檔，有權變身。「齊鼓掌」有點廐侶「偉感」的影子。「利之寶」大外檔蝕唔起。
   
　　「愛拼者贏」此程不易突破。「鴻福星威」11檔及耐冇出，多少有戒心，限敲。

第5場  第四班（60-40分）1400米

　　新領袖初見好即贏，完全冇手影捉，加分唔多，連捷壓力不大。「愛拚者勝」和「飛躍之鋒」唔似贏得，但未至於冇機會，前駒近績固然有點睇頭，後駒亦於前仗露了光。
   
　　「確叻星」上賽因出閘唔好打亂了整場發揮，唔好以為技止如此。「雄心馬主」堯仔未必駕馭得來。「好辣椒」唯一生機就係畀佢慢放愚敵，而呢個可能性唔係冇，因今賽冇乜步速。「紅旗輝揚」初出「外遊」，賽績唔使理，睇樣唔曳，小心開氣後即現形。「招積仔」上仗因意外大敗，騎師出閘後左腳脫出腳踏，所以敗唔作得準。

第7場  第三班（85-60分）1000米

　　萬事佳4場直路賽得3W1Q，準到咁都冇咩好挑剔。「軍策令」之前在同程一再跑得好，正路腳。
　　
　　「賞蝦王」級數在此略秤高多少，始終係準開嘛。「如日方中」來到最近一次試閘留下唔錯印象。「尚駿心」早已指出實力係「有限公司」，人哋跑得唔好，佢至有機會入Ｐ。「奪寶」如繼續喪放或可混水摸魚。

第8場  本地三級賽 2400米

　　至勇威龍回一回之後，做番晒工夫，試大閘亦贏得清脆，進度重新起莊，恃輕磅跑Ｇ３也不怕。「好先生」唔明點解上賽跟好位返嚟無以為繼，但計級數及路程能力，乃主角之一。
   
　　「魔法幻影」大長途開正佢嗰瓣。「首飾奇寶」仍堅持低潮已過，畀多次機會。「喜威寶」上屆此盃入Ｑ，有一定能力，加上近仗試到後追跑法，戰鬥力更強。「家家興旺」和「駿綵」輸級數，三三四四之流。

第9場  第三班（80-60分）1400米

　　高手上賽前隔咗一排冇跑，試大閘又唔對路，居然前中段放快咗，返到嚟都斷唔晒，那個第六名有驚喜﹔狀態重新起飛之後，唔跑短途寧增程，適唔適應到難講，由於今場早段快極有限，佢嘅主動跑法可能佔優。「蓬萊仙子」做番留放根本連二班都有得揮。
   
　　「天祿」及「勝利飛駒」班利，卻欠近績支持。「友利多」地淋則幫好多。「千江映月」演出向來算可靠。「談笑用兵」唔係之前曾放緩操練，應會看重。

第10場  第三班（85-60分）1800米

　　火龍駒初出跑得含蓄，一樣輸得唔遠，走勢甚具跟進價值，呢次加程只會更啱。「印度光輝」陣上長期有保證，回配德叔亦好。
   
　　「利好」上次大敗與馬匹實力無關，落到三班隨時發圍（上季又係重戴眼罩即勝）。「紅跑車」未交代前好似有用不完的力。「鎗臣」和「非常好」納於邊線。「綠色駿駒」人弱、「明駿之寶」班次吃緊。