洪禮賢講馬：爆發力五班超級

魑魅魍魉

　　今晚8場全泥宴，不成文規定係爆梗，因睇番上次泥地夜賽，8場中有6W賠率在10倍以上，唔到大家拗頸，吼熱門的熱情唔好太過分。而望落騎練的出馬形勢，冇乜邊個特別吸引，更覺今夜危危乎﹗

重心場次

第3場  第三班（80-60分）

　　1200米時時攞彩唔知上賽係收斂後的成果，還是換咇幫到，總之贏來大把在手，沿途操控順滑晒。照計升班冇有怕，尤其負磅少了一截，仲換上柏寶。唯一要擔心係此廐今季仍未有連捷馬出現﹗﹖

　    「馬之王」三班唔係好超，勝在陣上總有兩腳，而季初對佢試泥閘印象唔錯，呢次轉場或是後着。「一定快」上賽真係放得太快，全程冇得唞氣但拉士可以斷唔晒，其實那席殿軍好叻，如肯執番正跑法，隨時返嚟。

    　「超群財星」回到起家路程，還要有埋１檔，正路腳。「高升」啱啱揀過，惟今場處境與剛仗兩回事。「名店之星」和「時代明星」老牌好手，回夠氣隨時又翻生。「開心好多」及「哈哈大少」下仗會到位。

第1場  第四班（60-40分）1200米

　　神殿往績一流，四班此程7戰未試過冇Ｐ，只要唔係冇得追，三甲實有。

　　「綠衣郎」試泥閘速度唔錯，而幾個月冇跑唔驚縮程，希望10檔唔好影響過巨。

　    「寶貝」喼到水準的話，目前分數仍有上升空間。「宇宙良駒」剛仗早段跟唔上就冇，呢次6檔起步有點尷尬。「現代武士」樣靚，但耐冇出兼初跑泥地，要博，好在有1檔及唔錯值博賠率。「辣得喜」唔係11檔會再揀多次。

第2場  第五班（40-10分）1650米

　　爆發力近績普通冇所謂，或是立心落班的前奏吧。總之，較早時可在四班兩度入Ｑ，處身五班可打橫行。「金威神童」奔放型，尤其在泥地會愈放愈開心，有埋1檔仲啱。

　    「將臣三號」賽前準備一再斷斷續續，唔知影響有多大，如果計評分則減到過晒籠。「煇煌駒」冇檔位形勢唔易克服。「冰火」在此班唔超卓，好在拉士肯湧。「大將風騷」及「大隊長」，有點班利卻欠根據，限於冷配。

第4場  第四班（60-40分）1800米

　　稻庭烏冬只要留放做得妥善，基本上，在四班咩場地的中長途也有攻擊力，既然此際演出穩定，可看重。「贏啲啲」當打係最大賣點，就算劣檔和班次稍失利，仍是爭勝主角。

    　「雙妙星」有晒泥地證明，但1800米係掹掹緊。反而「金球」此程比一哩好衝。「壽比南山」泥地性能未必可靠。「全能」及「活威小子」如利後上，或有Ｐ。

第5場  第四班（60-40分）1650米

　　天寶之威處於戰鬥期，一日未斷纜仍要重視，何況今場整體條件依然唔錯。「馬有成」近兩場在中程得一Ｗ一Ｑ，轉場發掘新出路，或會繼續好。

　    「金獅猛將」情況與前駒差唔多。「飲水思源」剛仗係腳傷復出後首戰，加上係草地賽，輸得遠正常，重新開氣後回到此程，效果應唔同。「八發八中」整體演出幾失望。「奄尖大少」一再加程而跑得好，來到泥地一哩應該更勁。「神勇將軍」場地冇問題，此程亦唔係冇把握，但外檔則唔夾。

    　「驕陽飛駒」上仗突如其來跑第五，但所負甚遠，水準唔高，失準馬咪太樂觀。「曉勝駒」班分均有利，但近況沉得交關。

第6場  第三班（80-60分）1200米

　　自家威季內演出準到痺，唞番夠再出，應有一定把握。「勁飛馳」連續兩場都有揀，表現仍保持到，好開冇理由挑剔。

    　「人緣好馬」季內兩Ｗ的賽績，放諸此場高晒。「風陵渡」及「實業輝煌」班次略失色，最多爭Ｐ。最睇唔透「易搏贏」，縮程會賺級數。「金鑽龍華」分數已飽和，純跑忠心程度。「聖迪達」上賽太曳，難再抱期望。

第7場  第二班（100-80分）1200米

　　大智慧冇咩唔好，隻馬往績太準，騎練泥地合作又喼到高上名率，有埋2檔而唔使負重，更加有利發揮，穩入前列。「魄力王」係少數此廐馬可在單一路程長期保持穩定演出，兜完圈之後又返嚟強項，要拖。

　    「萬能駒」有個幾月時間調校，縮程不成問題。「步步快」搵到最佳跑法後忽然轉場，看似冒險，但轉到泥地的對手真係更水皮。「明燈」和「高點」冇場地根據，卡士則ok。「得到寶」與「威利嘉」邊線馬。

第8場  第三班（80-60分）1650米

　　和諧大使剛仗初跑泥地的演出算及格，始終之前曾有一段時間冇出賽，希望今場態況更紮實，威力有所增加。「寶樹多盈」前仗克服到外檔，希望今次一樣，計能力在此數一數二。

　    「引伸波幅」銳不可當，但始終係初跑泥地。「銀影激光」和「卓爾不凡」唔似有冠軍相，但未必冇能力爭Ｐ。「銀太陽」近績嚇死人。