曼城降摩追半場和

猪拉多纳

英法大戰睇住嚟食

歐聯16強首回合今晚繼續開Show，今個星期重頭戲必選「英法大戰」，英超曼城主場迎戰法甲榜首摩納哥。曼城上屆歷史性殺入歐聯4強，全因踢法轉型愈踢愈聰明，主場出擊亦唔會好大喜「攻」，近10仗歐聯主場有8次開出「半場和」，面對實而不華嘅摩納哥預計會謀定而後動，續追半場和好路。

（有線61、64、201及203台周三凌晨3時45分直播）

曼城一向係進攻型球隊，上季喺英超亦係入波最多球隊，但去到歐聯就以穩守行先。曼城上屆歐聯一共踢咗6仗主場比賽，當中5次開出半場和，尤其係3仗淘汰賽階段嘅主場賽事，曼城唔單止半場同對手踢成0比0，3場波最終都可以保持零失球，成功封殺鋒力強橫嘅巴黎聖日耳門同皇家馬德里。
8成入波來自下半場

曼城中前場球員年紀較輕，耐力十足，所以曼城亦偏向喺下半場先發力，近5仗主場賽事4勝1和入10球，當中只得2球係上半場攻入，8成入波都係換邊後先嚟料。巴西前鋒加比爾捷西斯早前重傷長抖，領隊哥迪奧拿更加唔會輕舉妄動，以曼城近10仗歐聯主場有8次開半場和嘅穩健作風，預計曼城比賽初段不會過分冒進。
摩納哥首回合小心行事

摩納哥今屆除咗最後1輪分組賽喺穩奪出線權下以0比3不敵利華古遜，其餘由第3圈外圍賽開始場場有波入，鋒力無庸置疑，但考慮到今仗只係首回合，作客出戰嘅摩納哥亦會小心行事，無需急於求勝，況且以該支法甲「一哥」嘅穩健防線，絕對有力保住城池不失，今仗半場打和機會頗高。