馬主論戰

魑魅魍魉

虎虎生輝變身

　　第五場賽事，相信焦點會落響四戰全勝嘅「盈彩繽紛」身上，但其實苗廐「虎虎生輝」（圖）都唔可以睇小，以往響田草1200米累積四場頭馬，擺明路有專長，上場轉跑谷草1200米，落敗唔可以作準，今次跑番強項路程有權變身。

　　另一匹要留意嘅苗廐馬，係第三場「驍騎無敵」，早前響田草1200米打叠贏咗兩場，姿態全部易如反掌，現評分肯定未盡，上場演出走樣，只係陣上一度失去平衡所致，今次如交番出應有水準都有勝望。

梁廷鏘

蜚聲質高贏得

　　早輪柏寶停賽，韋達就猛咁贏馬，仲進佔埋騎師榜首位。今日柏寶終於復出，唔使講一定會盡量數胡，我睇好佢今日有馬贏。柏寶坐騎之中，最啱心水係第三場「蜚聲」，在港兩戰試過跟前同留後，結果全部上名，擺明係質高分子，今次再跑田草1200米係時候出頭。

　　冷門方面，可博第二場「清風送爽」，在港兩戰雖然全部三甲不入，但其實都唔係輸得遠，證明呢匹自購馬有一定戰鬥力，早前試泥閘觀感唔錯，跑番沙田隨時可以偷襲。

張敬山

告仔綠續有贏

　　近期告東尼嘅表現，似乎冇蔡約翰同大摩咁搶眼，但今戰東廐有多匹惡馬列陣，相信都係時候發威。最啱心水係第九場「綠續有贏」，前仗能夠彈甩「歡樂繽紛」贏馬，已證明質素一流，上仗轉跑泥地輸咗，賽績唔能夠作準，今次跑番草地賽應該會有唔同演出。

　　另外鍾意「威利旺旺」，上場跑打吡雖然偷唔到雞，但表現已令人眼前一亮，反映四歲馬愈跑愈進步，今次告東尼再挑戰難度，安排呢隻馬跑女皇盃，隨時又一次帶嚟驚喜。

任達華