葡萄牙-2照發維

猪拉多纳

新星冒起幫輕C朗

今晚世盃外圍賽終於輪到C朗登場，佢將於歐洲區B組率領葡萄牙主場鬥拉脫維亞。歐國盃盟主葡萄牙現時已經唔係「C朗一人球隊」，事關今季冒起1位超新星射手米基爾施華，呢位21歲小將近2輪外圍賽獨取4球，鋒芒直逼C朗，甚至被譽為C朗接班人。葡國跨世代入球機器拍住上，可以大炒拉脫維亞，葡萄牙讓兩球都要讓球主勝。

（有線61及201台周一凌晨3時45分直播）

C朗踢國際賽曾被譏諷為「弱隊殺手」，果然「名不虛傳」，葡萄牙上月外圍賽主場對安道爾，C朗個人入咗4球，之後作客法羅群島，佢亦有1球進帳，帶領葡萄牙連續兩場大勝6比0。除咗C朗之外，效力波圖嘅前鋒米基爾施華，亦值得留意，佢都連續兩輪外圍賽入波，上輪大炒法羅群島6蛋，佢更大演帽子謝法。米基爾施華為葡萄牙上陣4次，就有4球進帳，效率極高，難怪被捧為「新C朗」。兩位高效射手合作，有力再大開殺戒。
拉脫維亞4主力缺陣

拉脫維亞實力低兩班之餘，仲有4位常規國腳前鋒拉基爾利、沙比拉、中場達美恩斯托利斯、卡奧拿受傷缺陣，中場線一個夠分量嘅外流球員都冇，令球隊雪上加霜。同埋拉脫維亞喺外圍賽兩連敗，而且都係主場賽事，今仗仲要作客，情況更加悲觀。
瑞士冇沙基利獻「細」

同組瑞士主場對法羅群島，榜首嘅瑞士3戰3勝，領先次席葡萄牙3分。不過瑞士進攻靈魂人物梳頓沙基利受傷，無緣今場比賽，恐怕難以炒爆法羅群島，入球大細中位數3.5球，寧願揀入球細。

（周一凌晨1時開賽）