李斯特城下盤起筷

猪拉多纳

紅軍「神經刀」靠唔住

來到新球季，肥叔今日首次同各位讀者傾波經，當然有猛料送畀大家喇，心水場次係今晚英超壓軸尾場，利物浦主場硬撼衞冕嘅李斯特城。紅軍依然堅飄忽，但仍受名牌效應影響經常要讓波，今仗仲要讓「狐狸」半一咁多，點講都講唔通，一於掉番轉頭捧下盤。

(Now 621及樂視體育周日凌晨零時30分直播)

肥叔成日都講，買波除咗要睇盤口、大戶有乜動作、軍情之外，仲要有獨立分析能力，千祈唔好一本通書睇到老。
名牌效應讓波易出事

好似啱啱周中嘅世盃外瑞士主場對葡萄牙，葡軍雖為新鮮出爐嘅歐國盃盟主，但要留意佢哋7場波於法定時間僅1勝，能夠奪冠有賽制之助及比重相當高嘅幸運成分，今仗仲有王牌C朗因傷缺陣，莊家已非常謹慎開出平手盤，葡軍只因名牌效應下被壓到低水，點知大戶及散戶一窩蜂撐上盤，肥叔見個下盤咁筍梗係重錘出擊，最終瑞士輕取兩粒，再次證明大戶買乜都唔好盡信。

今晚利物浦對李斯特城嘅情況有啲相似，儘管唔係開平手盤，但紅軍明顯受累於自己嘅名牌效應，今仗要讓半一咁辣之餘，仲要只得七七水咁低，從盤口嚟睇似乎冇得輸，甚至有大戶入定少少上盤添。不過若然有追開紅軍開咧後嘅表現，就知佢哋仍不改近年嘅「神經刀」本色，佢哋可以擊敗勁旅阿仙奴，轉過頭又會輸畀升班球隊般尼，唔多靠得住。相比之下，肥叔始終相信「狐狸」爛船都有三斤釘，個下盤仲有逾2倍真係超級筍，有買趁早。