英軍試陣唔大至其

猪拉多纳

前場好睇 後防閉翳

英格蘭嘅歐國盃之旅今晚展開！「三獅兵團」熱身賽頭炮喺曼城球場迎戰另一支決賽周分子土耳其，眾星為入圍終極23人名單，肯定博盡唔敢揸流攡。不過英格蘭今仗殘陣出擊，中前場幾好睇、後防就好閉翳，成隊得番史東斯一個健康嘅中堅，似乎要以攻為守，熱身賽冇包袱可望演士哥大戰，1.92倍入球大抵玩。

（周一凌晨零時15分開賽）

近2年彈起唔少新星嘅英格蘭，今屆歐國盃難得人才濟濟，領隊鶴臣挑選26人名單，計牌面算係唔錯，不過今晚一戰就天殘地缺，事關曼聯同利物浦兩隊球員因為應付球會賽事未歸隊，意味朗尼、拉舒福特、基斯史摩寧、史杜列治、占士米拿、尼達利基尼、拉爾拉拿同佐敦軒達臣都會no show。
得史東斯一個健康中堅

鶴臣喺地莊人腳下，前線仍有哈利卡尼同占美華迪壓陣，呢對今季英超入49球嘅組合畀到人信心，加上韋舒亞同迪利亞里都有後上入波能力，今仗唔憂冇士哥。但係中堅基斯史摩寧缺陣就影響極大，由於英格蘭只選3個中堅，啱啱傷愈嘅加利卡希爾只係練咗一課，意味唯一健康嘅中堅史東斯，可能要同客串嘅艾歷迪亞鎮守中路，隨時出事。
土耳其熱身賽踢法開放

土耳其今仗都有阿達杜倫、紐尼沙軒同布拉卡爾馬斯要踢球會比賽冇到，不過領隊泰林初選揀咗成31個球員，人腳仍然充足。土耳其近9仗友賽入面，有8仗總入球達3球或以上，證明佢哋踢熱身賽嗰陣踢法都會比較開放，今仗對住有前冇後嘅英格蘭，對晒嘴形，預期會有大量入球出現。