洪禮賢講馬：滙名燈靠得住

纯情小彩迷

　　韋達今期在騎師王仍然係十幾蚊貨仔，但感覺上同剛賽唔同，隔夜賠率熱唔透，未必係好事。而蘇狄雄雖然多咗隻馬補出，但整體上唔算起眼，居然只係十幾倍，似乎唔可以過分睇淡佢啲馬﹖﹗

重心場次

第8場  第二班（100-80分）1650米

　　特寶樂一連三場皆入前兩名，贏「鷹闖」一役前快後快固然有水準，而前仗只係輸畀造出今季此程最快時間的「藍天」，那席Ｑ腳唔會失禮﹔單以呢兩場賽事水準放在此場，而佢只係負中磅（騎練季內谷草合作上名率近６成半），點會冇得爭。

    　「幸福紅椒」剛仗之勝的確係受惠前中段扯散晒，但見佢拉士好似唔使點用力就過晒，姿態太過誇張，升班仍唔覺有阻力。「精彩生輝」11檔影響有幾大唔知，但前一場初跑此程，C欄10檔兼且131磅，返嚟輸條頸，難度好高，所以呢場可能亦克服到。「金碧亮馬」能在唔講究跑法的讓賽情況下大勝「精算攻略」，二班實夠分量，至於上場之敗，則因直路阻到揪起，可以唔使理，今次好檔及磅輕，隨時返嚟。

    　「飛躍王子」上場直路既內閃又遲遲始撻得着後勁，仍有殿軍算叻，轉場會賺級數，但12檔及初跑谷草則係致命傷，有賠率尚可一博。「包裝老友」如果唔似上場唔要命咁放，或有機會在今場撈到油水。

第1場  第五班（40-0分）1650米

　　贏啲啲試完泥地，又回到一哩，縮落短途贏得係場地性能，論路程能力還是此程較強，好歹曾壓倒「我跑得」，而與「世世無敵」串Ｑ，如果133磅不致拖垮，仍有再捷能力。

    　「華劍寶」和「第一好運」，一對主動型跑法之馬，檔好而形勢又就，應啱發揮。「火鳳凰」輸在大外檔起步，不易快過前兩駒攞到主動權，難跑。「紫荊」唔只一次在陣上有走勢，差唔多係時間郁手。「朝東之星」剛仗追得好的賽績，唔覺好有說服力。

第2場  第四班（60-40分）1650米

　　勁擊對上兩場在處理上俱有問題，前仗放頭唔知為乜﹖而上場則因騎師的取位不好，令直路打困籠，但追得唔錯似乎來到季尾又跑番起﹔轉用硬淨的馬偉昌，換人心意好，如果有得追，佢就有機。「包裝好友」跑法主動，轉場會好，２檔又夾啱，正路之選。

    　「越戰越勇」連仗皆唔覺有咩起眼的走勢，但剛仗同程直路中段阻到揪起後，拉士尚可湧番上嚟，多少係意想不到，降班跑或博到懵。「寶威威」和「雄爆」剛仗表現其實唔係特別叻。「順利多」遊了兩圈花園，忽然返谷草用柏寶，看來會出現近兩仗「外遊」的機會唔大，如跑得好有權掃晒，始終係曾打低贏到上三班的「旅遊小子」。「八哥福星」上賽已指出要盯緊，但爆完回班及換人，唔敢追。

第3場  第四班（60-40分）1650米

　　鵬力洋洋隔夜熱到十幾蚊，賠率係超賣，事實上，131磅及初跑谷草，唔係冇難度，當然，如果計佢上場力撼「名人」賽事水平，單起隻眼都夠贏。

    　「超力好」及「十足十」，一隻連勝兩仗，分數已具壓力，另一隻則板斧有限，但一對馬俱跑法進取，已是揀得上手了。「燈胆寶」從來冇打叠上名，唔知今場會否例外。

    　「富高盈」上場追得好係內欄慳位所致，呢次10檔難應付。「財富之星」老退但評分減至有利水平。

第4場  第四班（60-40分）1200米

　　得令先鋒如果唔係有痰，今場條件一流，只因檔好、路程啱及對手弱。「祥禎」上場轉後追跑法，成隻馬可以唔同晒，可塑性幾高，估計跑長二百米只會更好。

　    「好玩」置身唔多快馬場合，形勢夾晒，６檔要攞欄唔係咁難，追多次。「奪寶群英」剛仗拉士連Ｑ都撻埋係略失望，但沿途跟前咗係事實，班利馬如執番正跑法，不難再起作用。「電訊巨星」短途係咪最好真係兩睇，因上場在直路遲遲才衝得起勁﹔「七星仔」上場慳晒仍跑輸畀前駒，除非今次Ｃ欄２檔着數到暈，若不，唔易上名。

第5場  第三班（80-60分）1200米

　　滙名燈一直準到痺，田草谷草亦如是，而有番一個月儲新鮮感，縮回此程唔會適應不來，有埋１檔更正。「跑得叻」少馬鬥搶，前中段會放得好自在，隨時又會帶到。

    　「開心自在」大外檔唔易克服，好在見上場早段已不似初出咁難穩定走勢，希望借助埋柏寶，會跑得出該有水準。「亞洲橙王」上場三班同程名次好後，主因係沿途大外叠，今次４檔好得多，或者有冷Ｐ。「聲威旺」如果喘鳴唔復發，有位置唔奇。

第6場  第三班（80-60分）1000米

　　同心威駿連續兩W俱有可觀性，時間快而姿態輕易，如果唔係際遇奇差，冇Ｗ有Ｐ。「風之子」銳開，而今場形勢或利後上，只係130磅已漸有壓力。

    　「期望」好耐冇跑此程，論分數已具危險性。「尚駿心」上場咬住好位返嚟卻連Ｑ都冇，的確係失望，買Ｗ唔建議，拖腳就無妨。「勝在分秒」108磅太輕，路程專家就算級數稍低也有機會爭Ｐ。「永利多」前仗尚且有殿軍，但呢次連好位都冇埋，難爭。

第7場  第三班（80-60分）1800米

　　紅跑車一旦跑番好，基本上目前分數並無阻力可言，說到底，上季曾在同程與「怡勝」串Ｑ，133磅也讓得起有餘。「龍的傳說」1800米應是最有競爭力的路程，長途馬好開，狀態唔難喼。

　   「士多啤梨」唔係痰作怪，長途能力在此班好堅。「朝東飛駒」累積兩場短途重新起莊，今次終於跑回合適路程，應該係落點。「威力高」試好晒路程、配件、跑法等等，預料今場會現形。