紅軍心繫歐霸爭王 車仔受讓有利可圖

猪拉多纳

今晚英超補賽重頭戲上演褪色「紅藍大戰」，由「紅軍」利物浦主場迎戰「藍戰士」車路士。紅軍早已心繫下周中對西維爾嘅歐霸決賽，為免有乜依郁搞到球員仲大劑，聯賽預咗就住嚟踢，車仔雖然踢緊風流波，但近4次造訪晏菲路球場未輸過，撞正有所顧慮嘅紅軍，受讓必捧1.83倍讓球客勝。

（now 621周四凌晨3時直播）

利物浦今季踢盃賽特別Sharp醒，先打入英聯盃決賽，又喺歐霸4強首回合落後1球下，次回合「反Cup」西甲勁旅維拉利爾3比0殺入決賽，若果下周中歐霸決賽擊敗西維爾奪冠，就可取得下屆歐聯入場券，因此眾將個心飛晒去歐霸亦無可厚非，依家剩番落嚟嘅聯賽對於紅軍嚟講等同雞肋，無論贏定輸都冇乜所謂。
藍戰士作客晏菲路往績好

紅軍現時雖有中場安利簡恩奇迹復出，但前中後3線亦有奧歷治、佐敦軒達臣及馬馬度沙高等受傷或停賽，領隊高普識分輕重，為免進一步增添傷兵，今仗對住車仔勢必勒住嚟踢。

上季盟主車仔表現令人失望，上仗作客更反輸畀新特蘭2比3，依家排喺中游已無欲無求，近5仗僅得1勝1和3負可見一斑。車仔今仗仲有隊長泰利坐波監，不過臨近歐國盃，主力如夏薩特、迪亞高哥斯達及法比加斯等唔想冇正選踢，近期表現明顯積極番好多，其中之前主場逼和熱刺2比2之役，「夏神」更係搏到尾攻入扳平波添。加上車仔近年作客晏菲路戰績唔錯，之前4次造訪取得2勝2和未輸過佳績，適逢紅軍有後顧之憂，車仔仲有得受讓咁筍，讓球客勝咪錯過。