阿仙奴齊腳打雀

猪拉多纳

相信近排茶餘飯後嘅話題都係李斯特城能否提前3輪封王，創造神話。各位球迷唔使心急，答案聽晚就會揭曉，今日我哋講番阿仙奴主場迎戰諾域治呢場先。位列第4嘅阿仙奴領先少踢1場嘅曼聯5分，來屆歐聯入場券未到手。不過阿仙奴「保4」經驗老到，加上球隊傷兵陸續康復，今晚主場對住近況低迷嘅「金絲雀」，1.97倍上盤係信心推介。

（now 621周日凌晨零時30分直播）

兵工廠上輪聯賽作客下游球隊新特蘭只能踢成0比0，痛失2分，亦同時宣告爭標失敗，依家同第3位嘅曼城同分，因得失球較差而暫列第4位，只係比少踢１場嘅曼聯多5分。球隊嘅靈魂人物奧斯爾就話，剩低目標係要超越曼城攞番個第三。呢位中場指揮官由開季至今已累積137次創造機會，先後打破謝拉特、傑斯同林柏特嘅單季紀錄。而且佢暫時仲以18個助攻排喺助攻榜「冧巴溫」，個人目標就梗係要打破埋阿仙奴傳奇亨利嘅20個助攻紀錄喇，到時就算拎唔到冠軍都有番個安慰獎！

阿仙奴早排表現反覆，主因就係隊中傷兵一大籮，不過呢班十字軍陸續康復，除上仗有落場嘅韋舒亞外，另兩位缺陣已久嘅中場阿歷士張伯倫同埋辛迪卡索拉都已經復操。再睇埋阿仙奴近幾場勝仗，都係喺保持不失之下大炒對手，相信今晚人腳難得齊章，要大炒諾域治唔係難事。
諾域治前後都死火

「金絲雀」諾域治近排認真低迷，近2場聯賽對新特蘭同水晶宮遭到2連敗，合共慘吞4蛋，依家跌落尾三護級勢危。最大原因係前線主力羅素馬田同埋後防大將添姆高路斯受傷缺陣，搞到金絲雀前線死晒火之餘，後防又多甩漏，況且佢哋作客表現一向唔掂，今季17仗客場比賽贏得3場咁大把，就算今晚受讓球半／兩球都無着數，Yennie推介1.97倍上盤。