馮諾嘉手記：福勝滿載 一不離二

纯情小彩迷

　　今日沙田十場賽事，雖然高班賽欠奉，但有兩場盃賽，其中第七場三班1200米樂善堂盃，係今日心水場次之一。呢場用「天久」做膽，上場賽前試閘走勢唔突出，冷到53倍開跑，可見幕後人信心唔大，但走勢一啲都唔曳，出閘即守好位，最後只輸畀「明燈」、「傾力之城」等惡馬得第三，熱身後狀態更弗，再戰同程隨時開齋。

　　配腳先拖「豐衣足食」，呢匹三歲馬同樣係潛質豐厚，季初熱身一場後，連續兩場奪冠，睇番上場贏馬姿態認真唔簡單，十四檔起步，早段被迫走二、三叠，入直路仲要移出更外叠衝，但後上追勢凌厲，最終壓倒「奇葩」贏馬，難度好高，今場上班再戰，負輕磅有利。「化工之昇」前次仲喺谷草1200米入位，狀態不俗，上場輸在排劣檔全程蝕位，今次抽一檔，出閘即可貼欄守好位，應有唔同演出。「十則圍之」近仗雖然冇乜表現，但係易廐後重新操練，馬房亦表示有信心，強配韋達，跑贏馬路程唔可以忽視。

季初打叠贏

　　第九場二班1000米直路賽，馬膽「福勝滿載」，在港四戰三勝，可見大熟當打，季初打叠贏，回氣一場後上次縮程跑1000米，以兩個半馬位大熱輕勝，二班未遇阻力，今次改配蘇狄雄負磅輕飄飄，冧攤應冇問題。配腳方面，最近連贏兩場嘅「明燈」，季內兩勝田草1000米嘅「齊歡唱」，仲有近戰非冠即亞嘅「富高勝」，都值得優先考慮。

　　第十場三班1400米，「歡樂繽紛」喺香港跑過四場，成績為兩冠兩亞，次次大熱都搏殺，難得狀態長期保持，上場初次增程跑1400米，又係排十一檔，只係以短馬頭位屈居第二，有咗路程經驗，今次應可補中，做膽。「談笑用兵」喺本地三戰兩度入位，今場跑1400米，多二百米更好追，排一檔預計可貼欄跟喺「金紫荊」後面，相當好跑，配腳首選。「金添好運」季內兩度喺田草1400米跑第二，路程有根據，要拖。「聖河」上場跑同程只係輸畀「沙貝利」，狀態回勇要兼顧。