多蒙特打吡大過天

猪拉多纳

為砌史浩克 失歐霸都制

今晚德甲重頭戲，當然係史浩克04主場對多蒙特嘅魯爾打吡大戰，兩軍都視為全年最重要比賽，史浩克上輪聯賽對恩高斯達特喺劣勢下都唔願追，多蒙特3日前歐霸盃對利物浦都不惜冒出局危險，留力等呢場，足見誠意十足。翻查往績，兩軍近8次交手有7次開大盤，今場大細中位數不過係2.5/3球，1.72倍大盤值得再追。（now 670、有線61、64、201及203台周日晚9時30分直播）

史浩克上輪作客恩高斯達特，決心畀年屆32嘅首席射手亨特拉爾輪休，即使落後3球亦不為所動，直至完場前15分鐘至放佢落場輕舒腳頭，擺明不計勝負，等佢以最佳狀態迎接今仗。多蒙特都唔怕執輸，佢哋3日前歐霸盃八強首回合主場對利物浦嘅大戰，賽前已經收起首循環贏史浩克嘅兩位入波功臣香川真司同馬菲亞斯真達，主力中堅柏柏斯達夫普路斯同中場根度簡仲連後備名單都冇，踢到下半場即使比數只係不利嘅1比1，球員都消極應付一味橫傳後傳，到下半場中段索性收起埋首席射手奧巴美揚，教練杜曹明顯志在魯爾打吡攞威，即使歐霸盃有出局危險都在所不計。
近8交鋒7鋪大

睇番兩軍人腳，雙方中前場都齊晒人，史浩克上輪慘敗後有超過一星期時間調整，球隊近兩次主場出擊全勝共入5球，前線亨特拉爾、迪山度、祖普莫亭、麥斯美亞及利萊辛尼均具分量，不過防線仍有賀維迪斯、拿斯達錫及內田篤人等傷兵，導致攻強守弱。多蒙特前線食胡人物比史浩克更多，近3仗聯賽合共轟入8球，今晚同樣上足彈藥等駁火。兩軍皆有前冇後，近8次碰頭有7次總入球達3球或以上，合共炮製24個入波，今晚預期會續演入球騷。