日本抖夠狂炸敍利亞

猪拉多纳

至於世盃外亞洲區第2圈E組上演榜首大戰，由「一哥」日本主場硬撼次席敍利亞。「東瀛兵團」已穩奪直入第3圈的入場券，但上仗特登收起本田圭佑同香川真司兩大主力，抖到夠今仗一定搏盡，擺明要喺主場攞威兼力保首名，加上近5次交手日本贏晒，點計都食住敍利亞，讓球主勝不容錯過。

（有線61及201台周二晚6時34分直播）
力保首名唔輸得

隨住西亞球隊近年每況愈下，日本同南韓於亞洲足球嘅領導地位毋須懷疑，尤其係日本最要面，喺世盃外第2圈首仗主場遭新加坡悶和0比0，畀傳媒插到開花，之後佢哋即知恥近乎勇連贏6場殺上榜首，有辦你睇。日本主帥夏利荷錫乃老江湖，明知主子咁要面，雖然已篤定至少取得最佳第2名出線，但仍要力保首名資格，上仗大勝阿富汗5比0之役，佢特登正選收起本田圭佑同香川真司兩大猛將，本田更全場冇出，明顯係夏帥識得分輕重。睇番E組積分榜，日本只係領先今仗對手敍利亞1分，如果今仗輸波的話就會失去「一哥」位，呢隻鑊佢孭唔起。

敍利亞今屆世盃外追到日本氣咳，表現唔曳，但中場查化爾上仗大勝柬埔寨6比0之役傷出，今仗難以候命影響唔細。日本除咗讓香川同本田抖到夠搏殺外，上仗先開紀錄嘅箭頭岡崎慎司亦弗到漏油，加上今仗係第2圈主場謝幕戰，「東瀛兵團」都希望大勝一場答謝粉絲，讓球主客和讓一球必捧讓球主勝。