愛華頓乘機踩多腳

猪拉多纳

今晚英超早場愛華頓主場撼阿仙奴，阿仙奴又嚟一周內跌咗兩隻盃，更盛傳今夏大換血，基奧特、梅迪薩卡等9名球員會被踢走，軍心點會好；相反愛華頓上周足總盃淘汰車路士入4強，士氣大振，加上近3次主場鬥「廠」未輸過，平手盤可謂坐和望贏。

（now 621周六晚8時45分直播）

阿仙奴近年不斷重複「季初大勇、12月名列前茅、2及3月歐聯同聯賽雙線崩潰、季尾保住前4」嘅循環，之前兩季仲話有足總盃落袋見吓人，但今季情況更惡劣，先喺足總盃8強輸畀屈福特衞冕失敗，周中歐聯16強「好合理」遭巴塞淘汰，一周內跌咗兩隻盃，難怪反主帥雲格嘅聲音更加激烈，連「迷雲黨」名宿伊恩胡禮都話，阿仙奴即將會有所變動，佢都唔敢講雲格個帥位仲穩唔穩。
兵工廠9將下季冇得留低

阿仙奴近日亦有傳今夏要大換血，除路斯基、阿迪達及法米尼約滿唔留外，迪布治、基蘭基比斯、梅迪薩卡、阿歷士張伯倫、奧斯賓拿及基奧特都被列入「可以轉會」名單，今季未完就傳出呢啲不利消息，況且阿仙奴近8仗僅1勝，軍心同近況都差到痹。

另一邊廂，愛華頓上周足總盃2比0擊敗車路士入4強，證明狀態回勇，今仗大有本錢打落水狗，而且愛華頓近3次主場對阿仙奴1勝2和未輸過，就算今晚有米拿拉斯及巴利停賽都未驚過。今仗讓球主客和「拖肥」要讓一球，即係連莊家都睇淡阿仙奴，不過斯維亦留意到今場讓球盤開出平手盤，斯維覺得捧愛華頓平手盤更划算。