熱刺衝冠發維 哈利仔留力聯賽搏殺

猪拉多纳

今晚英超上演獨腳戲，阿士東維拉主場對熱刺，雖然熱刺連續兩場失分，但今仗對手只係排包尾嘅維拉，呢支北倫敦勁旅勢必趁機爭取大勝重振軍心，追趕榜首李斯特城。維拉聯賽4連敗失15球，表現潰不成軍，今仗預料捧蛋居多，Mic少直取熱刺2.2倍讓球客勝。

（now 621周一凌晨零時直播）

熱刺上周中歐霸16強首回合作客吞多蒙特3蛋，但要留意當時領隊普捷天奴將射手哈利卡尼、中場拉美拿放喺後備席，明顯忽視呢項「二奶盃」，寧願留力爭英超錦標仲實際。熱刺近兩場聯賽先後不敵韋斯咸0比1及打和阿仙奴2比2，目前已落後李斯特城5分，為一嘗成為英超王者滋味，餘下9場聯賽絕對不容再失，今仗應會強陣出擊，重新派「哈利仔」正選登場全力搶分。
維拉積弱輸埋鬥心

包尾大幡阿士東維拉今季戰績低迷，29場聯賽只得16分，落後尾二嘅紐卡素8分，兼且仲要踢多1場，睇怕護級機會相當渺茫。事實上，從維拉近期比賽所見，部分球員落場已採取半放棄態度，表現毫不積極，當中對利物浦、曼城分別大敗0比6及0比4，依家嘅維拉可以話任由對手宰割。

再睇埋往績，雙方近8次對賽，熱刺取得7勝1負，其中6次能夠淨贏維拉兩球或以上，完全食住對手。今仗足智彩開出讓球主客和熱刺讓一球，讓球客勝當然值博。