日本U23攻伊 細搶奧運門券

猪拉多纳

日本U23同伊拉克U23今晚喺卡塔爾舉行嘅U23亞洲盃4強戰交手，勝方進身決賽，即係直接攞到里約奧運足球賽參賽資格，所以兩軍都極重視今仗。不過兩軍喺8強戰都要踢到加時先淘汰對手晉級，體力消耗咁大下未必回得切氣，阿謙估計兩支疲兵對決未必多波入，一於捧細盤。

（now 671周二晚9時30分直播）

日本U23上場8強憑後備入替嘅岡山綠雉中場豊川雄太，同FC東京中場中島翔哉梅開二度，喺加時連入3球，先至以3比0淘汰伊朗U23打入4強。不過「東瀛小子」喺呢場波耗力甚大，一眾主力好似前鋒安拿胡阿道、中場原川力同後防龜川諒史等都踢足百二分鐘，嚟到4強呢啲關鍵時刻，相信主帥手倉森誠唔敢冒險派副選，都會原陣出擊，球員攰爆下相信會踢得較保守。
兩軍兵疲4強睇定食

伊拉克U23上仗同樣踢到加時，先以3比1打敗阿聯酋U23，但伊拉克U23最終能夠贏波，好大程度係因為阿聯酋U23有3位主力缺陣。伊拉克U23陣中雖然有大國腳好似中場侯斯尼、塔里克同後衞艾迪耶在陣，但佢哋上場搏到咁盡，同樣面對未必咁快回得切氣嘅情況，加上4強戰雙方唔會輕舉妄動，阿謙估計入波都係一球起兩球止，一於推介細盤。