黑風雙煞衝擊力強 日本恃高撞散泰國

猪拉多纳

U23亞洲盃B組，「足球小將」日本U23再次登場迎戰泰國U23！日本首仗旗開得勝，今場只要全取3分就可提早出線，日本中前場人才鼎盛，包括徵召「黑風雙煞」鈴木武藏、佐佐木阿道，提升球隊衝擊力，令日本剛柔並濟，Mic少認為泰國好難招架得住，直取日本U23讓球客勝。

（now 671周六晚9時30分直播）

雖然日本U23首仗只係1比0小勝踢法硬淨北韓U23，但其實開波5分鐘就開紀錄，未能贏多粒的確可惜。或多或少亦因為第1場波，日本U23球員表現比較拘謹所致，來到第2仗對住泰國U23，加上已有3分在手，應會踢得更放。

日本最大優勢係進攻球員猛將如雲，包括效力瑞士超年青人嘅久保裕也、奧地利薩爾斯堡射手南野拓實，後者今季奧甲已有7球進帳。當然唔少得日職代表淺野拓磨，佢本身屬於大國腳，上月為廣島三箭踢世冠盃亦有波入，卡士十足。最引人注目係兩位有黑人血統嘅前鋒鈴木武藏、佐佐木阿道，身高1米85嘅鈴木武藏上仗踢足全場，利用身型優勢壓逼對手防線，今場正好可以剋死身形較矮嘅泰國球員。

泰國U23上仗1比1逼和沙特阿拉伯U23，球員技術不俗，以地面組織向對手施襲。不過，講到技術型踢法，日本始終係亞洲一哥，如果兩隊採用相同踢法，日本肯定佔優，可以格食格打敗泰國。
北韓沙特「大」駁火

B組另一場北韓U23對沙特阿拉伯U23，兩隊首輪都失分，今仗再贏唔到，出線機會將非常渺茫，預料雙方都會豁出去，最好揀入球大。

（now 672周日凌晨零時30分直播）