水手 勝利防線「大」執位

猪拉多纳

澳職今日獨腳戲由中岸水手主場迎戰墨爾本勝利，主隊今季「擺爛」排積分榜包尾，不過上場神來之筆贏威靈頓鳳凰，對一班新人嚟講絕對係支強心針，今仗迎戰衞冕盟主墨爾本勝利亦有信心搶攻。勝利近況大不如前，最衰係仲有4名守將要為澳洲U23踢太公波缺陣，今場隨時大手交易，1.48倍入球大咪嫌熱。

（有線64及203周五下午4:40直播）
雙方多人要踢U23亞洲盃

水手上仗主場3:1贏鳳凰，繼開鑼日後拎到今季第2場勝仗，雖然前鋒奧當路雲上場用頭撼人被罰停賽8場，不過佢哋1月轉會市場重開即刻連簽3名新兵，包括22歲門將貝雷、24歲進攻中場史迪拉及17歲前鋒布夏基亞，由於正選門將保羅艾素要隨澳洲U23隊比賽，貝雷好可能要立即披甲上陣，防守難免出現漏洞，不過水手班新人依家士氣唔錯，前鋒費斯格拉特博轉會亦會施展渾身解數爭入波！

另邊廂嘅勝利經歷噩夢12月，5場聯賽得1和4負後，上場終於擊敗紐卡素噴射機為2016年開個靚頭，可惜今場又有5名球員要為澳洲U23出賽唔喺度，其中加利富高、史葛加路維、謝利亞同湯馬士丹治都係守將，令防線人腳捉襟見肘。佢哋賽前從侯姆城簽入翼鋒恩咸加強兵力，擺到明係要以攻為守，今場好大機會上演入球騷。