高清睇跑馬：富高勝篤定連捷

纯情小彩迷

　　  今季總場次351田草三班1200米，「富高勝」排十四檔出閘順利，韋達推騎下並進佔第二位，雖然對面直路走二叠無遮擋，但入直路不用大力推騎已拍住前領的「雄心馬主」，過了三百米韋達落鞭推騎下反應更佳，輕鬆彈甩近兩個馬位，可能因表現出色，韋達亦多次拍馬頸以表愛錫之心。

　　  或許大家認為該戰蹄下敗將未算強勁，賽績不能過分高估，但三歲馬負一二九磅輕勝確有難度，況且由1400縮落1200米亦不易應付，可見勝後加十分甚合理﹔質素非凡之馬升上二班必無阻力，磅位驟減亦有助進取，篤定連捷。

　　  此外，季內總場次334田草三班1600米，「國寶」起步迅速，不用韋達推騎已主動跟前，但未知是否步速跟中短途不同，抑或馬匹進步極大，本身前速已不如早前般慢。該役牠一早居於第四位，跟「喜綵」一同走二叠，直至三百五十米望空時，更只能在「喜綵」及「招積仔」之間的窄位衝刺，可能年稚馬有點膽怯，反應未算凌厲。

　　  不過，直至最後一百米時，或許「國寶」見到外邊的「我愛您」愈衝愈勁，這樣才喚起強勁的爭勝意欲，可惜遲望空兼空位無多，最終姍姍來遲追回一席季軍，落後頭馬「勁快」僅一個馬位，表現已算及格﹔不要忘記當時是初跑1600米，可見這次升上三班負輕磅更好跑，有力食尾胡。

Sam