馬主論戰

纯情小彩迷

冷敲正本仁心

　　  蘇保羅近期成績都唔錯，如果想發新年財，不妨吼實佢手馬，其中出第十場「正本仁心」就最啱心水。季內贏田草1200米之役，蹄下敗將「魄力王」、「紀利威龍」之後都有馬贏，證明賽事水準高。

　　  上場「正本仁心」再跑田草1200米，響楊明綸胯下全程走大外叠，敗不作準。今次換湯智傑騎，雖然都係排響外檔起步，但如果早段能夠搵到遮擋，留力響末段衝刺，話唔定可以交出不同表現，同場名氣馬多，呢隻馬會有合理分頭，值博。

梁廷鏘

正本仁心電訊巨星賀歲

  　　今日係大年初三，先祝各位《成報》讀者馬運亨通、橫財就手﹗今次我隻「電訊巨星」有份上陣，上次響谷草1200米跑得好近，似乎狀態已經嚟咗，增程跑1400米應該更啱發揮，重戴眼罩估計都有一定幫助，希望可以贏馬賀歲喇﹗

　　  另一匹要留意嘅馬係第三場「芙蓉威龍」，響谷草1000米熱身一場之後，上場增程跑1400米即刻變身，輸畀「有莊有閑」唔夠一個馬位得第二，後勁馬今次增程跑1600米仲好，柏寶唔放手應該有計。

張敬山

過年大家開心

  　　踏入虎年，祝願各位《成報》讀者萬事如意，身體健康﹗過時過節，梗係要搵番啲意頭馬捧場，其中最鍾意尾場「大家開心」，今季跑四場獲冠亞季各一，演出夠晒準，最重要係以往兩配馬偉昌都入Q，今次人馬再度合作，值得睇好。

　　  另一匹應景馬係第二場「豐衣足食」，上場失驚無神響田草1200米爆冷贏馬，雖然只係贏亞軍「好歌」一條頸，但後駒再出亦與超級馬「盈彩繽紛」串Q，賽績夠硬淨，今次呢隻馬再跑贏馬路程，有望再贏。

任達華