馮諾嘉手記：雅雪連捷話咁易

纯情小彩迷

　　今日沙田馬場舉行賀歲賽，節目相當豐富，十一場賽事包括賀年盃同香港打吡預賽，兩場大賽可以話係分量十足，尤以打吡預賽最為矚目，當中嘅「締造美麗」在港七戰獲六冠一亞，實力咁犀利，呢場可能又係佢嘅表演賽。賽事精采之餘，大彩池嘅獎金亦相當吸引，馬會為增添佳節氣氛，動用三T儲備二千六百萬元，一注獨得嘅話彩金將有五千萬元，比起近年，今年嘅彩金顯得特別豐厚，睇番三T三關，並冇夾雜好難估嘅五班賽，每關亦有啲重心馬喺度，尤其係尾關第七場「勇敢小子」，至今四戰未輸過，搵到馬膽，可以拖多幾匹配腳，所以今日嘅三T絕對有得諗，大家亦不妨花啲心思刨吓馬，分分鐘大發新年財。除此之外，入場嘅朋友將獲贈電話繩，仲有好多精采節目助興，大家都不妨入場湊吓熱鬧，贏馬攞頭彩。

精英財星搵到支持點

　　心水場次第二場四班1200米，用「精英財星」做膽，呢匹馬喺香港未嘗一勝，但由三班落到嚟四班，已搵到支持點，近兩場跑田草1200米都得第三，走勢進步，上場只輸頭馬四分三馬位，乘勇再戰，鬥志十足，可望補中。

　　配腳方面，「松林之星」前仗係蔡明紹胯下跑同程得第二，只係輸半個馬位，今日回配蔡明紹，但連續落咗幾日毛毛雨，場地多少受影響，對後上馬有啲不利，同埋要克服十一檔，惟有拖腳。「喜在心頭」七歲老馬，今季喺谷草連番跑入三甲，呢程表現雖然冇谷草咁好，但好在今場對手非強，馬匹近態又好，要拖。拖多一匹，上場同程奪冠嘅「豐衣足食」，今次抽得十四檔，亦係配腳之選。

　　另一心水場次係第六場三班1400米，亦係三T次關，「雅雪」今季初出因心律不正而大敗，但休戰幾個月後再出，快放下以兩個幾馬位彈甩對手贏馬，只要身體狀況保持良好，以佢嘅質素，今場要取連捷話咁易。

　　配腳先揀前次喺同程贏馬嘅「安御」。其次係「金津好」，今季六戰雖然未能贏馬，但係場場輸唔夠兩個馬位，演出準繩，配腳要拖。「海王子」今季初出已贏同程，路程首本要兼顧。