馮諾嘉手記：魄力寶手執盃耳

纯情小彩迷

　　聽日賀歲馬，重頭戲之一係賀年盃，唔少馬主、練馬師都希望響新一年贏馬攞頭彩，如果能夠捧走呢個盃就更具意義。

　　睇番今年賀年盃嘅形勢，大摩雖然係雙龍出海，但「點心」同「君皇鷹」近績只係普通，所以小妹都係較睇好「魄力寶」可以捧盃。呢隻馬由四班殺到上一班，上場響1400米力撼「新力勁」同「好日子」兩匹惡馬，結果僅以短頭位影相輸咗得第二，但已證明六歲馬仍然有分在手。再睇廐侶「好日子」其後可以捧走百年紀念瓶，更加證明賽事水準好高，今次「魄力寶」再跑強項1400米，可望捧盃而回。

　　「君子一言」上季一出即勝，令外界對呢匹馬都充滿憧憬，可惜早前卻被驗出右前腿腱鞘勞損及右前足外側籽骨韌帶受傷，今季一直跑唔到。不過，近期呢隻馬晨課操練已經回復正常，吼準盃賽場合先上陣，唔排除可以憑質素搭夠。

　　「火箭動力」上場又有番接近走勢，話晒上季都贏過「閒話一句」，用到巫斯義唔似陪跑。「秘密行動」直路例衝一段，話唔定可爭位。「君皇鷹」回配主帥白德民，應該會有唔同發揮，四連環不妨拖埋。

　　第七場二班1600米，「勇敢小子」跑四場贏晒，穩膽。配腳先揀「卓爾非凡」，經過兩仗熱身之後，上場末段衝得好勁追入第四，要繼續吼實。「家家興旺」後勁好強，負重磅都有權衝得近。「勇者無敵」在港兩場頭馬都在同程取得，擺明路有專長，咪睇小。「飛躍王子」熱身一仗後隨時變身，兼顧為上。