瑞典讓波反得過

猪拉多纳

北歐宿敵瑞典、丹麥於歐國盃附加賽冤家路窄，周日凌晨上演嘅首回合瑞典先有主場之利。瑞典神鋒伊巴謙莫域向來恃才傲物，偏偏過去六次上陣鬥丹麥都冇士哥，有被剋死味道。瑞典喺今屆歐國外入波有一半來自伊巴謙，如果佢死火瑞典等同讓半臂，丹麥近五次碰頭取得四勝一和壓倒性優勢，瑞典讓平半建議捧下盤。

（有線61、64、201及203台周日凌晨3時45分直播）

瑞典、丹麥呢對北歐死對頭以往喺歐國盃曾締造唔少經典時刻；2004年決賽周，兩隊喺分組賽最後一輪打和2比2，「合力」踢走意大利成為球壇一大懸案。之後08年歐國盃外圍賽，瑞典作客丹麥喺踢到3比3嘅時候，因為球證判咗一個12碼畀客軍，搞到有疑似丹麥球迷衝入球場襲擊球證，令賽事腰斬，結果丹麥被判輸0比3，最終緣盡該屆決賽周。今次兩軍再被抽中喺附加賽碰頭，兩隊只能活一隊，為爭取決賽周席位必定搏甩髀。
瑞典一半入球源自戰神

自從上述所講球證被襲事件之後，瑞典喺國際賽再冇贏過丹麥，對上五次碰頭竟然只得一和四負成績，而且五仗比賽一球都入唔到。眾所周知瑞典近年進攻好倚賴伊巴謙莫域，偏偏呢位剛於瑞典足球先生選舉九連霸嘅前鋒，職業生涯六次上陣鬥丹麥都未曾攞到士哥，似乎被丹麥睇通晒路數。由於今屆瑞典喺分組賽所入嘅十五球有八球來自伊巴謙，一旦佢無法打破對丹麥嘅入球荒，瑞典想贏波唔容易。
丹麥熟路往績贏條街

丹麥無論踢法及風格都同瑞典非常接近，彼此已經熟晒路，而且佢哋陣中冇伊巴謙莫域呢類所謂「星級」球員，相比之下踢法更加整體及機動化。由於今場只係首回合，估計丹麥亦會先求穩守，唔會過分急攻，佢哋對上四仗歐國外有三場成功保持不失波，可見防守力相當不俗，今仗有望全身而退，受讓平半值得支持。