馬主論戰

纯情小彩迷

加眼罩特好

　　剛啱李廐爆咗隻「齊喝采」，今晚呢個馬房都有唔少馬出，我估繼續會有馬贏。最啱心水係第七場「特好」，上場跑谷草1200米表現平平，但嗰場係一班賽對手好強，今次落番嚟三班跑兼初戴眼罩上陣，應該會有唔同演出。

　　另一匹要留意嘅李廐馬係「不老英雄」，剛戰響田草1400米殺入一席第三，似乎嚟到六十餘分水平已經搵到落腳點，轉嚟谷草一哩匆匆再出，以往響同程曾獲一亞一季，點睇都係想趁馬弗搏殺，有分頭更值博。

（梁廷鏘、寇鴻萍）

特好留意旅遊小子　　

　　跑埋今晚要到虎年先有賽事，希望可以幫讀者標到尾會。半冷馬可以吼吓第六場「旅遊小子」，上場返三班作賽，排十一檔全程走外叠都跑第四，只係輸畀頭馬「一團威」個半馬位，證明仲有分在手，今次增程跑1800米排埋內檔起步，分分鐘贏得。

　　另外推介頭場「秒秒領先」，上場響谷草1200米入Q，只輸畀「好爽」半個馬位，證明路合發揮，唞兩個月先再跑，期間操練正常兼試過一課泥閘，擺明箭頭放響今仗，值得捧場。

（任達華）

發達心聲連捷

　　今晚係牛年送歲戰，希望各位讀者都可以贏錢過肥年。全晚最鍾意第五場「發達心聲」，上場響谷草一哩贏到對手冇得跑，拋甩亞軍「追月」個幾馬位，更彈甩季軍「超勁精神」五個馬位，計姿態實在超班，今次再跑同程，睇唔到有任何連捷阻力。

　　另一匹心水係尾場「威利多多」，近四場跑谷草1000米同1200米，合共獲得兩冠一亞一殿，演出真係好準，雖然今次係馬房第二出賽選擇兼用梁明偉騎，但未必一定係副車，不容忽視。

（張敬山）