馮諾嘉手記：威利多多谷戰可靠

纯情小彩迷

　　今晚谷草八場賽事，心水場次第五場三班一哩，用「發達心聲」做膽，呢場三匹領放馬「寶成智星」、「中華英雄」同「包裝老友」都排外檔，預期佢哋都會搶放，會扯散馬群之餘，仲會造成快步速，估計三駒前段都會消耗唔少體力，所以都係揀返啲中後置嘅馬，「發達心聲」今季跑呢程全入前四名，兼夾新勝猶勇，今場抽四檔可望連捷。配腳方面，「財到得勝」老馬今次強配韋達，仲抽到黃金一檔，大可貼欄跑，等入直路發力，拖腳首選。「超勁精神」上場同程後上獲季軍，今場排內檔，形勢有利可再入前列。「不老英雄」剛戰田草1400米入位，匆匆再戰，輕磅有利要兼顧。

聲威旺一檔好跑

　　第七場三班1200米，「聲威旺」近兩仗跑同程都入位，今場得一檔之利，貼欄守好位相當好跑，作膽。配腳先揀「團隊精神」，上場跑同程贏來有餘未盡，再戰依然值得睇好。「眾威旺」上場跑泥地1200米，後上贏馬姿態實在吸引，回師谷草1200米亦啱腳法，拖埋。「精彩生輝」今季跑田草亦不勝有位，論卡士高過同場對手，但係排十二檔戰鬥力減弱，惟有作配。

　　第八場一班1000米，馬膽「威利多多」，雖然報名時係告東尼第二選，兼配梁明偉，騎者今季暫時只贏六場頭馬，為爭取成績實好鬥志，一於咪理表面嘅嘢，支持梁明偉憑「威利多多」打破悶局。講番馬匹本身，最近谷戰演出可靠，上場1200米只輸埋門幾步跑第二，今次跑1000米可望補中。呢場預期步速頗快，所以配腳揀咗啲後上馬，如「鼓浪天風」同「開心風采」，前駒呢場排內檔好跑，後駒上場贏馬，末段造出快時間。最後加埋抽到一檔嘅「鑽飾光芒」，形勢亦有利。