馮諾嘉手記：引伸波幅繼續贏

纯情小彩迷

　　剛戰前小妹睇過天文台預測，原本只係話有幾陣雨，點知最後係連場大雨，連賽果都受到影響，剛戰就好幾場爆冷喇！

　　當日小妹對蔡廐「越跑越有」好有信心，用呢隻馬做膽買Q同QP，結果嗰場無端端爆出匹「將軍歡笑」，雖然小妹都有拖到佢，但只係中得QP，收穫梗係「差之毫釐、謬之千里」喇！不過，當日激氣嘅唔只小妺一個，皆因賽後見到黃汝安響過磅室門外都幾氣憤。咁又係嘅，「雄獅寶貝」最後一步畀人劏咗，令到馬房少咗場頭馬，當然覺得唔抵喇！

　　雨落唔停，天文台預測聽日會有陽光，希望到時天氣真係會好轉。不過谷草賽事，無論如何都係揀啲內檔馬捧場穩陣啲。第四場四班1650米，小妺揀咗「引伸波幅」做膽，上場響同程以兩個半馬位輕勝對手，今次抽到三檔起步，有力贏完再贏。

　　配腳方面，「九龍寶」上仗初跑谷草一哩，返嚟只係以短頭位輸畀對手，有過路程經驗後，隨時有更進步演出。「果然勁」排一檔可全程慳位，要拖。「叫關快」唞夠轉場出擊，咪睇小。「揀得正」上場近番，拖埋冇蝕底。

　　第六場三班1800米，小妹鍾意「同心同德」，上場同程跑第三，只係輸條頸畀「士多啤梨」，今次捲土重來可以補中。對手方面，「財駿福星」排一檔要吼實。「旅遊小子」上場已證明三班夠爭，強配杜利萊夠硬淨。「威力高」已經連續兩場接近，隨時郁手。「士多啤梨」跑法夠主動，可放入一席。