洪禮賢講馬：質超駒夠Power

纯情小彩迷

　　近期谷草頭馬來來去去都係那幾個馬房，唔係阿方，就係航哥、良哥或石哥。至於騎師方面，一個柏寶solo啊，嘩﹗連續四期谷草嘅騎師王都畀佢擸咗，呢次佢出足咁多場，冇理由場場同佢對着幹啩﹗﹖

重心場次

第3場  第四班（60-40分）1200米

　　質超駒上場大熱得第三，好似跑啱晒都逼近唔到頭二名，但有兩點大可推翻此睇法，首先，沿途走勢似乎過於積極，其二，末段騎者唔見得好努力（亦有可能佢feel到唔多咪輕手啲），總之若然唔係諗多咗，呢次換人而磅位仲輕咗，理應更有power。

　　「魔力勁」初跑谷草碰釘，係唔適應，還是早段被擠後upset咗，好難一概而論。今場轉配件，可再畀機會，始終大前仗贏馬水準唔錯。「龍船旺」分數賺到笑，路程又啱，檔位亦佳，只係磅位重而已。

　　「馬有成」上場無故跑田草也輸唔遠，轉番此程，負磅減及檔靚，邊線腳。「太陽昇」唔鍾意上場擺前走的發揮，換上韋達，隨時唔同晒。「大師傅」大前季至今的2W10P當中，僅得兩場係打叠上名，呢次喼唔喼到好難講。

第1場  第四班（60-40分）1000米

　　勁爆力啱啱輸一條街返嚟唔緊要，因連同上場在內，冇一次跑泥地唔係輸到甩轆，總之回到此程演出便不一樣（5場四班同程累積2冠1亞2殿），就算五檔略有影響，放得出，二叠也蝕得起。「同心威駿」唔多確定剛仗輸近係利放的形勢，還是真係進步，但有一點可肯定，本身出閘反應比前仗銳利，不過季內兩役依然未識轉腳，鬥到拉士點都蝕啲。

　　「喜在心頭」及「當旺」各有根據，正路配腳。「加州首長」1000米明短（上賽後騎者指出要加程﹗），呢次仍然唔加住，就算剛仗有追勢，也不敢跟進。「偉感」有質但走規未完全改善，四檔如匿得好則可威脅。

第2場  第四班（60-40分）1650米

　　神州穿梭喼得住跑頭，上場即重現威力，叮噹馬頭衝輸冇得講，當然，在港跑成三十場也未贏嘅馬，買Ｗ不宜，ＱＴ膽則勝任。「天寶之威」長期在田草輸唔遠，轉谷草或撈到油水。「足球大師」八檔要搵遮擋不太難，如際遇ok，續可交出成績。

　　「超力好」主觀意願似落班才搏，但問題係點解仲要再在今場捱打﹖呢場少馬放場合，105磅擺喺前，放唔到正常，但Ｐ可能?到。「快馬當先」上場成條直路騎師只得一個動作…「揪」，如果唔係窒到尾，或有生機，不過連跑三場同程逐有進步，遇冷可敲。

第4場  第四班（60-40分）1650米

　　霹靂子彈前次隔咗一大輪冇跑，在此程一樣得殿軍，至於上賽忽然尾二的敗績，全因沿途「外遊」影響，根本唔使介意，呢次重返此程，出動到柏寶（人馬未嘗合作），有理由相信呢場會係落點（騎練季內谷草上名率達76%，今晚1匹合作馬）。

　　「福到多多」前次贏完，上賽尾二，一切全拜胡亂發揮所致（頭兩段快放至51秒22，馬王都燒乾﹗﹖），按敗後試閘的走位，及今場重配巫記，估計跑法會用番留前鬥後，苟如是，隨時起死回生。「健康藍莓」及「引伸波幅」條件倒四正，要贏唔易，入P則唔難。「創新高」仲有冇如剛仗的超利後追形勢，很難預測﹔「世世無敵」十二檔際遇聽天由命，俱為可爭不穩。

第5場  第三班（80-60分）1200米

　　嘉飛重磅唔易贏，好在對手明顯比之前兩場失色，大大提升競爭力。「相見歡」兩場谷草交足貨，但一再衝輸，係冇運，抑或底子見盡，真係見仁見智，感覺上博Ｗ有點唔抵，Ｑ腳就實要拖。

　　「靚得開心」剛仗直路發揮睇完嘔電，如果唔係衛韜禮過分猶豫，唔知入好定出好，以之後嘅勁勢，若然衝程唔係被延誤，Ｐ一定有，反映轉場係賺點級數，希望騎者今次乘二檔之利，處理上做好啲，成績可更進一步。「連利福星」前仗幾乎有Ｐ，隔一隔重返此程，有埋一檔幫手，大條道理出冷。「寶利多」及「無敵福星」邊線腳。

第6場  第三班（80-60分）1200米

　　紅封包騎練合作準到痺（季內谷草上名率7成半），馬兒亦擅跑此程，有埋一檔賺腳程，膽材。「龍武軍」另一路程專家，可惜十檔際遇難料，同埋重磅點都有影響。「歡樂出擊」卡士比大部分對手優勝，如果養得番，目前分數至少兩Ｗ未兌現。

　　「海王子」略有級數，儲點新鮮感料可應付此程。「化工之昇」遇上同場實力對手失準的話，有能力乘虛而入。「劍鋒」十二檔兼Ａ欄，唔易帶到。

第7場  第三班（80-60分）1650米

　　開心歡樂熱得有點過分，隔夜Ｗ一度唔夠兩倍，雖則係進步緊，話晒轉場並加磅，要贏可能有阻力，三甲則唔擔心。「士多啤梨」及「輕越直前」或掌握晒步速，計跑法前駒可能賺啲。

　　「緣是燦爛」終於回到草地賽，為免走寶，呢一注唔慳得。「共同努力」的跑法和性能，轉到谷草或更好。「易搏贏」唔係排大外檔已經揀咗。

第8場  第三班（80-60分）1650米

　　精算攻略唔似得前仗咁傻，係咁在早段耗損氣力，即於上場在同程掄元，仲要贏到甩晒，按理四升三班唔會有太大阻力。「牛精富星」位好，計分數則差唔多到頂。

　　「威海歡騰」冇馬走或步速唔快，隨時有着數。「馬風雲」失準難靠，但Ｐ唔敢抹煞。「金獅猛將」略嫌上場被檔位形勢影響，畀多次機會。「金碧亮馬」及「搏得威」大外檔令能力大打折扣。「生生不息」剛仗季軍的水準尚待證明。