曼城「黑雙煞」喪攻西維爾

猪拉多纳

冇阿古路同大衞施華，又有乜好怕喎？曼城今晚喺歐聯再一次唔齊腳出擊，但隨住佢哋喺上輪英超大炒般尼茅夫五個一皮，證明「藍月亮」冇咗「阿Kun」同大衞施華一樣夠殺。「新黑雙煞」史達寧同韋菲特邦尼On Fire，有力率領曼城砌低今晚嘅D組對手西維爾，曼城讓半一捧上盤。

（有線62及202周四凌晨2:45直播）

曼城喺國際賽後中咗「FIFA病毒」，早前鬥紐卡素狂入5粒嘅阿古路要抖1個月，中場指揮官大衞施華都打埋柴，個個都以為「藍月亮」呢鋪濕滯啦，殊不知佢哋即刻憑史達寧同韋菲特邦尼包攬5個入波，以5:1大勝般尼茅夫，將Fans嘅憂慮一掃而空。
史達寧埋門有進步

當中大演帽子戲法嘅史達寧表現最Sharp醒，呢位翼鋒埋門把握力一向麻麻，但對住般尼茅夫連續呃到兩名敵將瞓低先燙入嗰球，證明佢喺埋門方面下過工夫。至於取代「阿Kun」打單箭頭嘅韋菲特邦尼，不嬲都有番咁上下射術，家陣趁阿古路缺陣，肯定加多兩錢肉緊「騷哥利」，證明自己夠料孭飛。加埋奇雲迪布尼同耶耶托尼穿針引線，曼城火力依然得人驚。

同曼城一樣，喺D組贏慕遜加柏、輸畀祖雲達斯嘅西維爾，本月頭喺西甲爆大冷造瓜巴塞隆拿，但查實佢哋今季聯賽只係贏過兩場，最近作客去到伊巴都要失分，海鮮味相當濃。況且鋒將卡古達、守將沙治奧艾斯古迪路同丹尼爾卡列高都養緊傷，前鋒洛蘭迪亦都上陣成疑，今鋪作客睇怕難逃一敗。