法國傷鋒作客丹麥獻細

猪拉多纳

歐國盃外圍賽踢到如火如荼，主辦國法國亦冇偷懶密密踢熱身賽，今晚又會飛去哥本哈根作客丹麥。法國前日主場4:0大勝阿美尼亞後，2大主力賓施馬、保羅普巴都受傷，今場贏面唔高，丹麥嘅歐國盃夢亦吊緊鹽水，球員未必有心機搏殺，玩1.59倍入球細算數。

（有線61、201周一凌晨2:45直播）

法國近期熱身賽表現唔錯，近3場都贏波，不過攻擊核心賓施馬、保羅普巴倦勤，對班波影響好大，預計由狀態低沉嘅基奧特頂賓施馬個位。弊在領隊迪甘斯都承認對基奧特失去信心，法國靠佢入波似乎唔多可信，而且眾球星亦唔想帶傷返球會報到，放軟手腳都係人之常情。
丹麥試陣為主

丹麥日前喺歐國外I組輸畀葡萄牙後，已經踢完所有分組賽事，可唔可以直接出線，就要睇今晚早少少開波嘅阿爾巴尼亞會唔會失分，試問班國腳點會唔分心？更何況丹麥近3場歐國盃分組賽都入唔到波，教頭摩頓奧臣講明試陣為主，入球唔慌多咯。