C朗死火葡萄牙獻「細」

猪拉多纳

歐國外I組今晚又有C朗登場，佢帶領榜首葡萄牙作客阿爾巴尼亞，牌面上客隊無疑係高出一班，不過C朗今季開咧後狀態麻麻，2場西甲同兩日前友賽法國都食白果，葡萄牙火力大受削弱，今場對住防守唔錯嘅阿爾巴尼亞唔慌多波入，1.57倍「入球細」可以一試。

（有線64及203周二凌晨2:45直播）

葡萄牙依家以4勝1負得12分排榜首，不過5場波加埋只係入得7球波，其中5球仲係C朗包辦。近年葡萄牙前鋒位置人才凋零，除C朗外只有史雲斯嘅艾達盧比斯一名正宗箭頭，場場都係靠C朗單天保至尊，可惜依家撞正呢位皇馬前鋒入球荒，睇怕葡萄牙都會踢穩陣波。
阿爾巴尼亞 首循環守贏葡萄牙

阿爾巴尼亞依家同多踢1場嘅丹麥同得11分，有機會首度殺入大賽決賽周，佢哋突然冒起好大原因係防守改善咗好多，就算唔計對塞爾維亞腰斬嗰場波，佢哋4場分組賽只係失咗2球，首循環作客葡萄牙佢哋就用穩守突擊戰術贏1:0，今場相信都係照辦煮碗，入球細有計。