法國客勝剝「牙」

猪拉多纳

迪甘斯落柯打砌盡

法國貴為2016年歐國盃主辦國，唔使踢外圍賽直接殺入決賽周，今晚佢哋作客約咗葡萄牙拍跳。雖然葡萄牙近況好轉，之不過佢哋殘陣應戰，下星期亦有歐國外後顧之憂，另邊廂嘅法國教頭迪甘斯就要求班波即時反彈，2.43倍客勝好路。

（有線64、203周六凌晨2:45直播）

主場出擊嘅葡萄牙近7戰贏6場，手下敗將包括阿根廷、意大利，照理值得秤先。不過隊波本身有中場威廉卡維奴、摩天奴、堤亞高文迪斯同左閘法比奧干查奧倦勤，搞到得番仲未喺西甲開齋嘅C朗攻堅，傷兵多，火力亦唔多夠。況且佢哋下周二仲要作客歐國外I組對阿爾巴尼亞，太公波肯定唔會搏盡。
葡萄牙留力踢歐國外

另邊廂嘅法國近4戰輸3場，不過教頭迪甘斯賽前警告班球員一定要改善表現，顯示出強大嘅爭勝心，換言之hea踢球員隨時被Out，班高盧兵點敢揸流攤。
射手賓施馬復出

事實上，法國為咗備戰歐國盃已經鋪定路操Fit狀態，計埋今場賽事，佢哋落實會喺歐國盃決賽周前踢多8場比賽，包括硬撼德國、英格蘭。呢次對住人腳唔齊嘅葡萄牙，加上射手賓施馬傷愈復出，係時候反底重響勝鼓啦。