廠仔省招牌有「利」可圖

猪拉多纳

小組短傳玩死「紅軍」大隻佬

「英超星期一」有場超重量級大戰，阿仙奴會喺主場惡鬥利物浦。雖然「兵工廠」開季踢唔出想像中嘅霸氣，幸好近年佢哋碰親「紅軍」都入波易過食生菜，撞正利物浦新隊長佐敦軒達臣因傷未必踢得，作客酋長球場好難攞到甜頭，阿仙奴讓半一照捧1.86倍上盤！（now621周二凌晨3:00直播）

阿仙奴季前雖然係威係勢，重奪酋長盃同社區盾錦標，可惜隨後開咧戰倒灶輸畀韋斯咸，上周作客亦只能以2:1險勝水晶宮，表面睇戰績確實唔多開胃。好在「兵工廠」傷兵唔算多，主要得射手韋碧克、中場韋舒亞同路斯基養傷，絕對有條件排番個靚陣，趁主場出擊踢番場好波省招牌，而且王牌阿歷斯山齊士傷愈復出後未入過波，今場肯定加多兩錢肉緊啦！
A山傷愈爭士哥

唔講唔知，「兵工廠」近年對住紅軍條防線特別有計，兩隊對上8次交手，阿仙奴竟然有7次至少攻入2球，包括上季主場贏4:2，由此可見領隊雲格嘅小組短傳打法，完全恰死利物浦班「大隻佬」後防球員，所以睇好阿仙奴可以砌低利物浦之外，「A山」嘅首名入球都值得兼顧。

客軍利物浦開季後連續兩場小勝1:0，唔算特別標青，弊在佢哋新加盟嗰件射手賓迪基明顯未入局，上星期佢對般尼茅夫之所以入到波，某程度係因為球證未熟新例睇漏「紅軍」有人越位，加上新隊長佐敦軒達臣上場帶傷上陣，踢到換邊後6分鐘就被換走，今戰都未必踢得，「紅軍」中場線冇咗佢壓陣，相信好難頂得住阿仙奴班星級戰將，正所謂得中場、得天下，梗係唔好錯過「兵工廠」上盤啦！