車仔明恰巴塞紙老虎

猪拉多纳

寸王遇冤家特別醒神

國冠盃「北美站」明早上演兩場比賽，焦點必屬車路士對巴塞隆拿！車仔今屆兩戰都未能於法定時間贏波，難免令人失望，但今仗應會醒神，事關領隊莫連奴一向視巴塞為眼中釘，以往喺歐聯同西甲積怨甚深，以「寸王」好勝性格，肯定趁對手缺少美斯同尼馬，贏番場漂亮勝仗攞彩，簡單要車仔主W。（有線61及201台周三早上8時05分直播）

車路士首仗大熱倒灶，2比4不敵紐約紅牛，上仗逼和巴黎聖日耳門1比1，發揮有改善，最後憑互射12碼勝出。經過兩場比賽後，狀態開始回升，準備好迎擊強敵巴塞。莫連奴堪稱拆「巴」專家，由19年前喺魯營擔任翻譯、助教，到之後率領車仔、國米、皇馬，多次同巴塞惡鬥，「寸王」對付巴塞好有心得，包括5年前帶領國米喺歐聯4強淘汰巴塞，最後捧埋盃。12至13年球季，為皇馬6戰巴塞，取得3勝2和1負優勢。相隔兩年，莫帥再遇老對手，相信仍然運籌帷幄。
冇尼馬美斯差好遠

巴塞上仗鬥曼聯，即使控球時間同攻門都比較多，但反而輸1比3，充分反映冇咗美斯、尼馬、丹尼爾、馬斯真蘭奴，僅得蘇亞雷斯撐場下，巴塞淪為「紙老虎」，虛有其表。更何況教練安歷基領軍功力，亦同莫連奴有一段距離，好難令巴塞化腐朽為神奇。

值得一提，車仔嚟緊周日，就要踢社區盾，跟住迎接8月8日英超開鑼，需要加緊催谷狀態及重拾作戰士氣。反觀西甲要等到8月24日先至開鑼，巴塞仲有時間Hea，唔會去盡。