森巴兵弱細難上委

猪拉多纳

冇咗尼馬 點夠人打

美洲國家盃C組最後1輪賽事，4隊分數及得失球差一樣，出線形勢極之緊湊。球迷最關注巴西能否晉級，佢哋將迎戰委內瑞拉，「森巴兵團」上仗0比1不敵哥倫比亞之餘，仲有射手尼馬被罰紅牌，停賽4場，令巴西頓失進攻重心，另外兩位前鋒迪亞高泰達利同羅賓奴質素平庸，睇怕難以咬入對手。委內瑞拉一直採取穩守踢法，遇上勁旅，更加會屯重兵死守。預料將形成拉鋸局面，揀入球細。

（now 681周一清晨5時30分直播）

巴西近年已成為尼馬1人球隊，首仗都係靠佢1頂1傳，先至驚險補時以2比1反勝秘魯。呢位巴塞射手要坐4場波監，對「森巴兵團」影響有幾大，可想而知。最大問題係巴西鋒線人才凋零，領隊鄧加只揀選3位前鋒，除咗尼馬之外，只有迪亞高泰達利同羅賓奴可用，前者僅効力中超球隊山東魯能泰山，根本未夠級數着9號波衫，上仗對哥倫比亞毫無建樹。至於羅賓奴無復當年勇，前兩場都冇份上陣，今仗焗披甲，實在靠唔住，入波機會低。
委內瑞拉踢法主守

委內瑞拉首仗爆冷以1比0擊敗哥倫比亞，全場只有4次射門，但有3次中目標，效率非常高，盡顯穩守突擊精髓。上仗鬥秘魯，原本都守得唔錯，但左閘阿武列比達唔生性，上半場已被逐，最終僅負0比1，已算有交代。
近兩對賽互交白卷

委內瑞拉今仗對巴西，相信會沿用主守踢法，即使阿武列比達停賽，但其他守將亦具級數，包括南特中堅維斯卡朗度、馬拉加右閘羅拔圖羅沙里斯、熱拿亞防中湯馬士連干，組成一道銅牆鐵壁，先做好防守，再博偷雞，否則被巴西先入波，就好難翻身。值得一提，雙方近兩次交手都互交白卷，委軍對防守巴西，的確有一手。