小森巴兵熄火吼細盤

猪拉多纳

話咁快世青盃來到4強階段，聽日晏晝頭場大熱門巴西U20出戰塞內加爾U20，「小森巴兵」去到淘汰賽前線集體熄火，連續兩場共踢240分鐘攰到爆，塞內加爾面對強敵亦唔敢輕舉妄動，斯維寧揀入球細。（周三中午12時開賽）

巴西U20於分組賽狂風掃落葉，3場贏晒怒轟9粒堅有霸氣，去到淘汰賽即刻變咗「鵪鶉」，面對烏拉圭同葡萄牙接連冇波入，最終要靠互射12碼先晉級，點解嘅？因為巴西箭頭祖迪雲對烏拉圭之役中途傷出，雖然呢位高士路前鋒今屆只入兩粒，但佢喺前線作為支點嘅造波同竄擾力，能為身邊隊友製造更多空間後上入楔，而另一射手馬高斯古靴美仲未開齋，曼聯中場安達斯彭利拿上仗更被貶為後備，難怪前線集體熄火，加上班生牯仔嚟到淘汰賽出現想贏怕輸嘅心態，變得保守導致冇士哥。最致命係「小森巴兵」連續兩場連加時踢咗240分鐘，你話唔攰都冇人信喇。
疲兵難炒塞內加爾U20

查實對手塞內加爾U20分組賽踢得麻麻，之後接連淘汰烏克蘭同烏茲別克亦略帶運氣，今仗雖有守將馬馬度尼戴耶刑滿復出，但輪到另一後衞穆哈美夫辛尼坐波監，令防線有隱憂，隨時玩拉布戰同堅攰嘅「小森巴兵」鬥磨，預計今仗唔慌多波入，入球細有1.68倍咪嫌少。

另一場4強戰塞爾維亞U20硬撼馬里U20，塞軍中場菲臘贊高域有機會擔正披甲，後衞加積斯坐完波監可復出，不過馬里上仗淘汰勁旅德國，表現令人驚喜，志切報番分組賽一箭之仇，而且自淘汰賽展開後頻開下盤，唔好睇得塞爾維亞咁高，不妨捧受讓嘅馬里讓球客勝。（周三下午3時30分開賽）