巴西省招牌 打殘秘魯

猪拉多纳

經歷世盃恥辱性慘敗後，「足球王國」巴西聽朝喺美洲國家盃登場，誓要省番靚個招牌挽民心。巴西自鄧加重掌帥印後贏到開巷，由尼馬同羅拔圖法明奴率領嘅鋒線亦得人驚，C組首戰人腳參差嘅秘魯，1.75倍「讓主」要捧。（now681台周一清晨5:30直播）
鄧加接手10戰全勝

無論幾時，巴西喺大賽都係奪標熱門，今屆美洲盃就更加係「復仇舞台」，畢竟佢哋上年世盃輸到冇晒面，「森巴躉」睇到喊嘅場面記憶猶新。咁對唔住班Fans，今次美洲盃仲點可以衰呀！

協助巴西喺70年勇奪世盃嘅名宿李維連奴，前日話主帥鄧加係「森巴兵團」嘅Mr.Right，全民都旨意佢帶領國家足球重新抬頭。鄧加重掌帥印後帶隊10戰贏晒勁入21球，當中仲有勇挫阿根廷同法國嘅代表作添。何況尼馬剛啱協助巴塞成就三冠王兼做埋歐聯神射手，佢嘅前線拍檔羅拔圖法明奴喺國際賽舞台亦頻頻有佳作，聽朝真係戥秘魯條防線擔心。
秘魯狂練突破越位

冇錯，秘魯備戰工夫係好認真，禮拜四朝冒雨喺特木科市練波，進行隊內對抗賽嗰陣仲搵埋旁證幫拖，練突破越位戰術。但佢哋大軍陣容中，中場主力大部分係國內聯賽搵食嘅二打六，王牌箭頭法芬同荷西古里路近年都回回哋塘，後者日前仲整傷足踝要撐拐杖添，就算聽朝出得狀態都未必係十足，點同巴西鍊吖？唔輸大鑊都偷笑咯！（ 美洲盃C組）