墨西哥Hea陣明益森巴軍

猪拉多纳

力爭6奪美洲國家盃嘅巴西，今晚會喺聖保羅同墨西哥拍跳，繼續進行備戰。「森巴兵團」雖然冇尼馬，不過一樣No Problem，皆因對家墨西哥個陣仲殘，巴西有「90後三叉戟」羅拔圖法明奴、菲臘比古天奴同杜格拉斯哥斯達攻堅都夠殺，捧1.87倍「讓球主勝」。（開賽時間：周一凌晨4:00）

美洲盃下周五開戰，奪標熱門巴西自從由鄧加重掌帥印後遇神殺神，8場波贏晒之餘，當中更有擊敗阿根廷同法國嘅佳績，睇得出鄧加係有料到。隊長尼馬啱啱踢完歐聯趕唔切歸隊，前線拍檔羅賓奴就因為練波時扭傷右膝，今場都可能冇份落場，不過亨格比利一啲都唔戥「森巴兵團」擔心。

事關喺鄧加掌舵下，呢隊巴西冇乜話邊個係重心，Teamwork反而係佢哋贏到開巷嘅主因，兩位今季喺英超、德甲都大放光芒嘅菲臘比古天奴同羅拔圖法明奴，盤射傳扭瓣瓣掂，搭住「新朗拿甸奴」杜格拉斯哥斯達衝鋒陷陣，要造低墨西哥綽綽有餘啦！
小豌豆韋拿冇入選

睇小墨西哥，因為領隊米基爾靴里拉勁睇重7月初舉行嘅美洲金盃，今次冇揀查維亞靴南迪斯、古亞達度同卡路士韋拿等骨幹入伍，其餘大部分係喺本土聯賽搵食嘅二打六，最出名係喺馬體會坐多過踢嘅前鋒魯爾占美尼斯。班底咁Hea，點會係巴西手腳呀？