自己友都唔撐 紐卡素無力扑錘

猪拉多纳

英國《鏡報》今個月初喺網上做咗一項民意調查，結果有8成半紐卡素球迷認為如果降班可以令班主艾殊利會賣走「喜鵲」咁佢哋寧願愛隊降班易主，重新上路。連粉絲都唔撐，試問紐卡素今晚對住韋斯咸點贏先？加上「錘仔幫」領隊艾拿戴斯曾經吃過「喜鵲」嘅無情雞，今場絕對唔會放水畀對手，一於捧受讓嘅韋斯咸啦！

（now 633周日晚10時直播）
韋斯咸叉足電上陣

紐卡素喺08-09年曾經降過班，不過球會最尾都冇易手，全因艾殊利叫價太高，所以「紐粉」想愛隊「置諸死地而後生」，以為降班就可以踢走艾殊利，可能最終都要失望。

「喜鵲」長期都係咁立立亂，柏杜任教嗰陣成績雖然唔錯，「紐粉」都仍然要佢下台，到依家卡華接手更加愈踢愈衰，最近10場輸咗9場。今仗賽前有報道指韋斯咸主帥艾拿戴斯（大Sam）畀班球員放咗成個禮拜假，對紐卡素嚟講睇落係好消息，不過可能係「空城計」都未定，放假唔操練唔一定係壞事喎，班「錘仔兵」叉足電上陣，隨時有驚喜，況且依家頹爆嘅紐卡素對住邊隊都好難贏波。
大Sam誓報被炒屈辱

大Sam曾喺07至08球季教過紐卡素半年左右，起初成績都幾ＯＫ，但去到中段遇上低潮期，難服侍嘅「紐粉」即刻群起聲討，鬧佢踢法唔好睇之餘又交唔到成績，最尾大Sam被炒。如果你係大Sam，呢啖氣又點會吞得落？今場梗係要叫班「錘仔兵」做好球員應有嘅「本分」，落場拚盡。加上今場有可能係大Sam帶領韋斯咸最後一戰，點都唔可以輸波咁冇面！有得受讓，當然捧韋斯咸啦！