廠將追車 般尼借歪

猪拉多纳

阿二鬥尾二 衝擊8連勝

今晚英超壓軸戰上演「阿二鬥阿二」，由聯賽7連勝嘅二哥阿仙奴作客尾二般尼。雖然「巨人殺手」般尼喺自己地頭對強隊特別醒神，但阿仙奴主帥雲格已經落咗柯打，喺聯賽最後直路全力追趕榜首車路士，並衝擊今季最長連勝紀錄，加上「銀河唯一」基奧特連續6場聯賽有士哥弗到震，般尼好難頂得住，直取讓球客勝。

（now 621周日凌晨零時30分直播）
基奧特腳風順爆

阿仙奴呢期實在弗到冇朋友，統計歐洲5大聯賽，佢哋同意甲嘅拉素同樣拎到7連勝，係全歐狀態最好嘅兩支球隊，只要贏多一場，就可超越曼城，締造今季英超最長連勝紀錄。阿仙奴能夠連場報捷殺上次席，最大功臣梗係法國箭頭基奧特，單計聯賽，「銀河唯一」已經連續6場有波入，連當年嘅「高貝利國王」亨利都做唔到，基奧特依家已同球隊名宿伊恩胡禮平起平坐，成為英超時代第3位「廠仔」做到此壯舉，只要今仗有士哥，便可追平「反骨仔」艾迪巴約嘅球隊紀錄，「基佬」腳風咁順，對手又係實力又低一班，今仗再入波應該冇乜難度。
雲格爭標未絕望

大家可能會話尾二嘅般尼為護級一樣搏甩髀，而且佢哋坐鎮草皮球場對強隊特別Sharp醒，唔單止曾悶和熱刺同曼聯，之前更爆大冷擊敗過曼城，堪稱「巨人殺手」，但阿仙奴氣勢太勁，近4次交手輸咗3場，格食格之下實在捧唔落手。

況且養傷多時嘅阿仙奴中場阿迪達、韋舒亞等已經好番，人腳更加充裕，就算依家落後榜首車仔7分兼打多一場，雲格依然落柯打要延續連勝勢頭，繼續向車仔施壓，睇得出「教授」仍對爭標存有希望，等待車仔失分。既然前4位置已穩，相信一班「廠仔」冇乜心理包袱下，一鼓作氣可輕取般尼，斯維建議捧讓球客勝。