俄羅斯闖黑山半場好和味

猪拉多纳

歐國盃外圍賽G組今晚有場直播戲碼，黑山主場惡鬥俄羅斯。雙方狀態都麻麻，有指若果俄羅斯未能殺入今屆歐國盃決賽周，主帥卡比路好大機會被請食「豉椒炒魷」，今仗喺箭頭基沙哥夫缺陣下，呢位金牌教頭一向怕輸唔敢冒進，對面嘅黑山「小妖」祖維迪又跌晒Watt，初段穩打穩紮隨時大放悶蛋，半場和值得捧場。

（有線62及202台周六凌晨3時45分直播）
卡比路穩守突擊保飯碗

雖然俄羅斯同領隊卡比路嘅合約至2018年，讓佢帶埋自己做東道主嘅世盃決賽周，但呢位年薪高達830萬歐元嘅主帥領軍戰績欠佳，近四仗贏得一場咁大把，令俄國足總非常不滿，有傳「北極熊」若攞唔到今屆歐國盃入場券，會考慮提早炒佢魷魚，卡比路梗係唔想咁快冇咗份筍工。不過好衰唔衰，撞正主力射手基沙哥夫因傷落選，其他前鋒如高哥連等唔多靠得住，卡比路又要拎出其看家本領──穩守突擊，佢老人家不嬲怕輸怕失波，最唔鍾意冒險，要踢得保守合晒合尺喇，等閒球隊好難咬得入佢哋。

黑山一向靠「兩妖」搵食，「老妖」兼隊長胡仙歷已離開歐洲主流聯賽，遠赴卡塔爾球隊艾查捷拉養老，始終兩地足球水準差幾條街，就算踢到曉飛都唔代表佢同以前一樣咁弗，「小妖」祖維迪情況更曳，在曼城淪為大後備，嚴重影響狀態，黑山仲有乜板斧殺敵呢？依家兩軍喺G組同得5分，只差次席嘅瑞典1分，大家今仗都唔想喺競爭對手身上輸波，預計唔敢輕舉妄動，初段大踢穩陣波隨時冇交收，斯維建議玩半場和。