鄧加掌帥順風順水 森巴兵劏雞還神

猪拉多纳

尼馬 羅拔圖法明奴「扭力」驚人

同一個場地，同一對組合，今晚熱身賽爆發「98世盃決賽翻版戰」，由法國喺聖但尼球場火併巴西。「森巴兵團」自鄧加重掌帥印後順風順水，兩大「扭神」尼馬、羅拔圖法明奴合組嘅鋒線更加係睇得又踢得，造訪群龍無首嘅「高盧雄雞」，2.67倍客W值博。

（開賽時間：周五凌晨4:00）

5屆世界冠軍巴西，喺上年世盃「壯烈出局」後正式啟動重建Mode，今晚對法國同3日後鬥智利嘅兩場拍跳，正正係練兵好時機，為6月12日展開嘅美洲國家盃備戰。重掌國家隊帥印嘅鄧加，賽前繼續懶理批評：「咩係足球藝術？喂，我覺得守門員撲救靚係藝術，搶到控球權亦係藝術，呢啲嘢好主觀！」

鄧加咁權威又無他嘅，畢竟佢上任之後「森巴兵」6場波贏晒，當中更有擊敗死敵阿根廷嘅佳績，又真係抵佢沙塵！
法明奴癲過洛賓「A山」

巴西大軍禮拜一已抵達巴黎備戰，喺法國奧委會總部、巴黎聖日耳門女子隊地頭查列迪球場練波。雖然有大衞雷斯、馬昆奴斯哥利亞因傷退隊，幸好仲有佔半個「主場之利」嘅PSG中堅堤亞高施華將肩負防守重任。

再講吖，家陣巴西食粥食飯始終要靠尼馬，呢位坦承贏完「西甲打吡」開心到瞓唔着嘅「新比利」，踏入2015年已經為巴塞喺各項賽事轟入12球，佢嘅前線拍檔、將首度「升呢」擔正嘅羅拔圖法明奴亦係猛料之人，今季喺賀芬咸已經貢獻6球同7個助攻，截至3月頭為止，今季嘅聯賽扭波成功次數更高達97次，仲癲過洛賓（88次）、阿歷斯山齊士（83次）同尼馬（68次），諗起都戥法國防線擔心。
法國冇大佬孭飛

主隊法國係2016歐國盃主辦國，未來呢年都係會靠熱身賽催谷狀態。佢哋自從老大哥列貝利退出國家隊之後，明顯冇人壓到場，隊長洛里斯受傷冇入選，就連未來支柱保羅普巴都打埋柴，想搵件大佬孭飛都冇。況且法國上年尾同阿爾巴尼亞踢熱身賽都贏唔到，之後鬥瑞典亦只係險勝1粒，冇乜霸氣唔似係巴西手腳。