德國圍毆袋鼠賀勒夫

猪拉多纳

世盃冠軍教頭續新約

國際熱身賽爆發世界冠軍火併亞洲冠軍好戲碼！今晚德國喺凱沙羅頓同澳洲拍跳，「日耳曼兵團」剛啱同主帥勒夫續新約至2018年，點計都要踢番場好波賀一賀佢，適逢今仗對手澳洲傷兵滿營，德國主場出擊有乜理由唔炒「袋鼠兵」鑊甘先？即使讓到2球都捧2.15倍「讓球主勝」啦！

（無綫翡翠台及TVB13周四凌晨3:30直播）

勒夫由04年起擔任國家隊助教一職，其後喺06年坐正，上年終於帶隊捧走世冠盃一搔「日耳曼兵團」24年之癢，獲續新約絕對理所當然。為備戰4日後鬥格魯吉亞嘅歐國盃外圍賽，勒夫呢排大把嘢做，畢竟高路斯同拿姆退出國家隊後，佢老人家點都要度靚個陣填補兩位老大哥嘅空缺，今晚鬥澳洲正正係試陣良機。
法蘭克福集訓 梅拿 列奧斯 葛斯擔正

德國日前喺法蘭克福展開集訓，預計湯馬士梅拿、馬里奧葛斯、馬高列奧斯等球星會悉數擔正，隊長舒韋恩史迪加復出，加埋科隆嘅祖拿斯赫達要「騷哥利」奠定正選席位，相信大軍唔會Hea踢，實行踩油入多2粒，一來要為勒夫贈興，二來就為下仗作客格魯吉亞場歐國盃外圍賽造勢。
澳洲卡希爾退隊 補選西悉尼射手

出爐亞洲盃盟主澳洲，計人腳輸德國幾條街，最弊係隊長卡希爾跟腱受傷，聯同中堅史柏拉洛域齊齊退隊，領隊普斯迪高路都知卡希爾唔在陣大劑，急急腳補選西悉尼流浪者射手杜米祖歷。但查實呢位射手受鼠蹊傷困擾咗一段時間，上星期已經唔能夠披甲喺亞冠盃鬥FC首爾，就算今鋪出得，狀態不足都唔會幫得幾多，「袋鼠兵」輸大鑊絕對唔奇。
盤路解碼

德國4戰，澳洲贏3場，勝率達75%。
Data King：德國鬥袋鼠半場不敗

‧兩軍歷來4次交手，德國取得3勝1負。

‧德國從未試過半場落後畀澳洲。

‧日耳曼軍團近18仗僅得1次換邊前失守。
乜都玩錦囊：博德國炒4:0、5:0波膽

基本上德軍今仗中前場都叫齊晒腳，加上佢哋呢次擺明有意搵澳洲練兵，為下仗作客格魯吉亞磨定把靚刀，想入多幾粒真係唔似有難度。考慮到澳洲前線冇乜邊個擔到大旗，唔似入到波，玩埋4:0、5:0波膽唔過份。